श्रीदेवीया नामय् विवाद

भारतया आर्थिक नगरी मुम्बईया छगू योजनाया नां बलिउड अभिनेत्री श्रीदेवीया नामं तयेगु तयारी यायेवं विवाद ब्वलंगु दु । मुम्बईया छगू फ्लाइओभर (आकाशे ताँ)या नां मदुम्ह बलिउड अभिनेत्री श्रीदेवीया नामं तयेगु तयारी यायेवं उकियात कयाः विवाद ब्वलंगु खः ।
फ्लाइओभरया नां सुं नं बलिउडया कलाकारया नामं विशेषतः नायिकाया नामं तये मजिउ धासें विरोध याःगु खः ।

मुम्बईया अँधेरीया छगू फ्लाइओभरया नां श्रीदेवीया नामं तयेगु तयारी याःगु खः। अँधेरीया लोखन्डवाला कम्प्लेक्स न्ह्यःनेसं च्वंगु फ्लाइओभरयात ‘श्रीदेवी उडान पुल’ नां नामं नामकरण यायेत भारतीय जनता पार्टीया छम्ह दुजलं इनाप याःगु खः ।उगु पार्टीया कर्पोरेटर योगीराज दाभाडकरं मुम्बईया मेयरयात छपु पौ हे च्वयाः फ्लाईओभरया नां ‘श्रीदेवी उडान पुल’ तयेमाःगु व थथे जुल धाःसा मदुम्ह श्रीदेवीप्रति सच्चा श्रद्धाञ्जली व सम्मान जुइगु धासें इनाप याःगु खः ।

तर उगु इनापप्रति असहमति प्वंकुसे स्थानीय मनूत विरोधय् कुहां वःगु खः। स्थानीय मनूतय्सं विरोध जक याःगु मखसे दाभाडकरया पौया प्रतिउत्तर बीकथं सुं नं व्यक्तिया नामं फ्लाइओभर तये मजिउ धासें मेयरयात काउन्टर पत्र च्वःगु खः ।