सूर्यविनायक गणेद्यःया खः जात्रा हन

ख्वप (रासस)/ गणेद्यःया जन्मोत्सवया लसताय् स्वनिगःया प्यम्ह विनायकमध्येम्ह छम्ह सूर्यविनायकय् म्हिगः सुथंनिसें गणेद्यःया खः जात्रा याःगु दु । भाद्र शुक्ल चतुर्थी चथाःकुन्हु गणेद्यः बूगु न्हि कथं हना वयाच्वंगु दु । थ्व हे लसताय् सुथंनिसें सूर्यविनायक गणेद्यःया देगलय् पुजा यानाः मू गणेद्यःया मूतिंयात खतय् तयाः जात्रा याःगु खः । न्हिच्छियंकं थीथी त्वालय् खः चाःहिका सनिलय् हाकनं देगलय् हयाः पुजा व आरती यानाः जात्रा क्वचायेकूगु खः ।
सूर्यविनायक नगरपालिका–८ या वडाध्यक्ष लिसें सूर्यविनायक क्षेत्र प्रबन्ध समितिया नायः पुष्पराज बस्नेतया कथं पुर्खांनिसें न्यायेकावयाच्वंगु गणेद्यःया खःजात्रा आर्थिक स्रोत मदयाः तःदँ न्ह्यवंनिसें दिनाच्वंगु खःसा वंगु स्वदँ न्ह्यवंनिसें हाकनं न्ह्याःगु खः । जात्राया झ्वलय् थुगुसिइ सलंसः स्थानीयतय्‌सं ब्वति कयाः सिन्दुर म्हिताः खः त्वाःत्वालय् यंकाः झःझः धायेक हंगु खः । गणेद्यःया वहःया झ्वाताःयात खतय् तयाः सिन्दुर जात्रा यानाः देगःया पश्चिमपाखे राजथला त्वाःतक, पूर्वय् चालिसे गामय् गहनादेवीया देगःतक, उत्तरय् सूर्यविनायक चुकः अरनिको राजमार्गतकया त्वाःत्वालय् चाःहिकाः हाकनं देगलय् हयाः जात्रा क्वचायेकी । खः जात्राया झ्वलय् सुथय् देगलय् विधि कथं पुजा यानाः द्यः दर्शन यायेत मू लुखाय् तयाः उकिया लिपा खःयात जात्रा यानाः त्वाः त्वालय् चाःहिकूगु खः ।