ब्वनेकुथियात शोकेस लःल्हात

येँ- नेवाः अमेरिकन दबू शिकागोपाखें जगतसुन्दर ब्वनेकुथियात शोकेश लःल्हाःगु दु । दबूपाखें ब्वनेकुथिइ चायेकेताःगु ‘मिनि नेवाः म्युजियम’या शोकेश लःल्हाःगु दु । दबूया पुलांम्ह नायःलिसें नांजाःम्ह बाखं च्वमि केशरमान ताम्राकारं शोकेश ब्वनेकुथिया प्रिन्सिपल मय्जु सुनिता मानन्धरयात लःल्हानादीगु खः ।
ब्वनेकुथिइ चायेकातःगु मिनि नेवाः म्युजिमय् ब्वयातःगु थीथी हलज्वलं तयेत दबूया आर्थिक ग्वाहालिं उगु शोकेश दयेका बिउगु खः । ब्वनेकुथिइ चायेकातःगु म्युजियमय् परम्परागत नेवाः बाजं, वसःज्वलं थलबल, तिसावसःलिसें मास्तर जगतसुन्दर मल्लं छ्यलादीगु थीथी बसजाः ज्वलं तयातःगु दु ।
थौंकन्हय् नेपाः झायाच्वनादीम्ह साहित्यकार ताम्राकारं अमेरिकां हयादीगु च्वसा ज्वलं ब्वनेकुथिया विद्यार्थीपिनिगु निंतिं लःल्हानादीगु खः । उगु इलय् दबूपाखें व्यवस्थापन यानातःगु छात्रवृत्ति कयादीपिं विद्यार्थीपिंसं ताम्राकार व वय्कःया जहान श्रद्धाकमल ताम्राकारयात खादा क्ययेकाः लसकुस यानादीगु खः ।