ने. सं. ११४६ चाैलाथ्व चतुर्दशी -

‘कीर्तिपुर : द लिजेन्ड अफ कीर्तिलक्ष्मी’ युट्युबय्

येँ – गोरखाया जुजु पृथ्वीनारायण शाहं किपुलिइ याःगु आक्रमणया घटनाया विषययात कःघानाः दयेकातःगु ऐतिहासिक संकिपा ‘कीर्तिपुर ः द लिजेन्ड अप कीर्तिलक्ष्मी’ युट्युबय् अपलोड जूगु दु । वंगु शुक्रवाः ईएन इन्टरटेनमेन्ट नेपाल टि.भी च्यानलय् छगू प्रिमियर शो यानाः युट्युबय् अपलोड याःगु खः ।

ल्याय्म्हम्ह निर्देशक प्रदीप खड्गीं निर्देशन यानादीगु थुगु संकिपा गृह मन्त्रालयं छगू कथं अघोषित रुपय् प्रतिबन्ध तयातःगु खः । करिब च्यादँ न्ह्यः हे निर्माण जूगु संकिपाय् उगु ईया युद्धकालीन घटनायात भीएफएक्स प्रविधि छ्यलाः दृश्यांकन यानातःगु खः ।

संकिपाय् गोरखाया जुजु पृथ्वीनारायण शाहयात खलपात्रकथं न्ह्यब्वयातःगु व वया वफादार सेनाकथं कयातःम्ह कालु पाण्डेयात स्याःगु इलय् छ्यं मदयेक नं ब्वाँय् वनाच्वंगु दृश्यया कारणं गृह मन्त्रालयं संकिपाया प्रदर्शनया निंतिं अघोषित रुपय् प्रतिबन्ध तयातःगु संकिपा निर्माण पक्षं जानकारी बिउगु दु ।

नेपालभाषाया ऐतिहासिक संकिपा राजमतिया नायिका हिसिला महर्जनं कीर्तिलक्ष्मीया भूमिकाय् म्हितादीगु संकिपा बासुपासाया ‘भैरव सिंह’ नांया उपन्यासया लिधंसाय् निर्माण यानातःगु खः ।इतिहासय् न्ह्यथनातःकथं नेपाः एकीकरणया नामय् पृथ्वीनारायण शाहं किपू राज्य त्याकेगु झ्वलय् स्वक्वःतक कथिन रुपं युद्ध संघर्ष यायेमाःगु खः ।

निक्वःतक युद्ध यानाः नं किपूयात त्याके मफयेवं स्वक्वःखुसी युद्ध नियम अःखः छलकपट यानाः किपू त्याकूगु, किपूमि जनतायात क्रुरतापूर्वक हत्या याःगु व किपूमि जनताया न्हाय् व न्हाय्पं ध्यंगु धइगु खँ नं इतिहासय् न्ह्यथनातःगु दु ।

फोकस पिक्चर्सया प्रस्तुति संकिपाय् यशराज गराच, हिसिला महर्जन, अञ्जला नकःमि, मणिराज लवट, मदनदास श्रेष्ठ, लक्ष्मी गिरी, मञ्जु श्रेष्ठ, सुशील राजोपाध्याय, सुरवीर पंडित लगायत आपालं कलाकारतय् भूमिका दु ।