वैशाखय् याक एण्ड यतिइ मदनकृष्ण लाइभ

येँ – सुखावती मल्ट्री प्रोडक्सनं थ्वहे वइगु बैशाख २२ गते होटेल याक एण्ड यतीइ मदनकृष्ण श्रेष्ठया नेवाः म्येँया लाइभ याइगु जूगु दु । नेपालभाषा नापं नेपाली म्येँ दुथ्याकाः उगु ज्याझ्वः यायेत्यनागु खँ बुधवाः छगू पत्रकार सम्मेलन यासें जानकारी बिउगु दु । संस्थाया अध्यक्ष सुरेन्द्र तुलाधरं बियादीगु जानकारी कथं नांजाःम्ह गायिका दीपा महर्जन नापं ख्याली जुजु मदनकृष्ण श्रेष्ठं उगु इभेन्टय् म्येँ न्यंकादी । छपाः टिकटया स्वद्वः तका मू तयातःगु उगु ज्याझ्वलय् न्यासः मनूतय् सहभागी दइगु खँ ग्वसाः खलकं धाःगु दु ।

पत्रकार सम्मेलनय् कलाकार श्रेष्ठं कलाकारतय् स्वास्थ्य सुरक्षाया लागिं कोष दयेकेगु निंतिं जुइगु थुगु इभेन्टय् थम्हेसिनं निपू स्वपू नेवाः व नेपाली म्येँ हालेगु खँ कनादिल । कलाकार दीपा महर्जनं नेपाली सांगीतिक ख्यलय् थः दुहां वनेत्यनागु जनाउ कथं थ्व ज्याझ्वः जुइगु खँ कनादिल । घौछि निसें निघौ तकया थ्व लाइभ इभेन्ट डिनर सहितया जुइ । ज्याझ्वलय् ललित मल, लण्डन फेसन होम, आर.बी. फिल्मस्, सर्वहित नेपाल नापं थीथी संस्थां ग्वाहालि यायेत्यंगु दु । नील शाक्यं लसकुस यासें न्ह्याकूगु पत्रकार सम्मेलनय् सुरेन्द्र तुलाधरं पत्रकारतय्सं न्यंगु थीथी न्ह्यसःया लिसः बियादीगु खःसा नेपाली फिल्मया ड्रिष्टिब्युटर गोपालकाजी कायस्थ, भोगेन्द्र मानन्धरपिसं नं इभेन्ट बारे थीथी खँ कनादीगु खः ।