क्याट्रिनाया सल्लाहकार !

क्याट्रिना कैफ म्हसीका बियाच्वनेमाःम्ह अभिनेत्री मखु । बलिउडय् थःगु हे बिस्कं म्हसीका दुम्ह अभिनेत्री क्याट्रिनां लिपांगु इलय् थम्हं छुं निर्णय यायेमाल धाःसा नायक सलमान खानया सल्लाह कायेगु यानाच्वंगु दु ।थ्व हे झ्वलय् छगू संकिपाया निंतिं साइन तकं यायेधुंकूम्ह क्याट्रिनां सलमानया निंतिं हे धकाः उगु फिल्म मम्हितीगु जूगु दु ।

चर्चित कोरियोग्राफर नापं निर्देशक रेमो डिसुजाया निर्देशनय् डान्सय् आधारित फिल्म ‘एबीसीडी–३’ पाखें पिहां वयेवं क्याट्रिनाया चर्चा जूगु दु । संचारमाध्यमय् वःगु रिपोर्टकथं संकिपा मम्हितीगु जुइवं चर्चाय् वःम्ह क्याट्रिनां उगु संकिपा मम्हितूगु कारण धाःसा सलमानया ‘भारत’ नांया संकिपाय् म्हितेगु निंतिं खः ।

भारतया छायांकनय् व्यस्त जुइमाःगुलिं क्याट्रिनां रेमोया फिल्म त्वःतूगु खःसां एबीसीडी–३ यात धाःसा सफलताया निंतिं भिंतुना बिउगु दु । यद्यपि क्याट्रिनां सलमानया हे सल्लाहकथं उगु फिल्म त्वःतूगु धइगु नं चर्चा जुयाच्वंगु दु ।