ने. सं. ११४३ तछलाथ्व दशमी -

न्यय्दँ लिपा स्थानीय लँ चायेकल

येँ – थनया येँ मनपा २२ वडाय् लाःगु लुँहितिइ च्वंगु छपु पुलांगु लँपु म्हिगःनिसें हानं चायेकेगु ज्या जुल परम्परांनिसें थीथी धार्मिक सांस्कृतिक ज्याया लागिं चले यानातःगु उगु लँपु वंगु ५० दँ न्ह्यवंनिसें बन्द यानातःगु खः । धराहरा पुनर्निर्माणया झ्वलय् म्हिगः उगु लँपु चायेकूगु खँ २२ वडाया वडाध्यक्ष चिनकाजी महर्जनं ‘नेपालभाषा टाइम्स’यात कनादिल ।

वंगु न्यय्दँ न्ह्यः अन टक्सार तयेगु ज्या जूगु खःसा उगु इलंनिसें उगु लँ वये वनेगु ज्या सरकारं बन्द यानातःगु खः । लँ चायेकेगु लागिं स्थानीय जनतां ताःई न्ह्यवंनिसें थीथी कथं इनाप याना वयाच्वंगु खःसां उकी सफल धाःसा जुइ मफयाच्वंगु खः । स्थानीय जनतां उगु लँ चायेके माःगु माग यासें आन्दोलन समेत याना वयाच्वंगु खः ।

चलन चल्तीया उगु लँ बन्द यायेगु ज्यां स्थानीय जनतां थःपिंत समस्या जुयाच्वन धकाः चायेकेत माग यानाच्वंगु खःसा म्हिगःनिसें विधिवत् रुपं लँ चायेकेगु ज्या जूगु खँ वडाध्यक्ष महर्जनं कनादिल ।

म्हिगः उगु हे क्षेत्रया सांसद कृष्णगोपाल श्रेष्ठया नेतृत्वय् अन बन्द याना तःगु नँयागु लुखा चायेकाः लँपु खुले याःगु खः । थ्व लँ भद्रकाली द्यःया जात्राबलय् अनं हे यंकेमाःगु खः । तर लँ बन्द याःगुलिं जात्राया लँ समेत मेथासं यंकेमाःगु खः ।

वहे लँय् स्थानीय मानन्धरतय् दुगुद्यः नं दुगु खः । आः लँ खुले जूगुलिं अन च्वंम्ह द्यः नं खुल्ला जूगु दु । उगु लँ बन्द जूगुलिं स्थानीय मनूत चाःहिलाः खिचापुखू वये वने यायेमाःगु खःसा आः लँ खुले जूगुलिं तप्यंक वने फइगु जूगु दु । थुकिं स्थानीय जनतायात अःपुइगु आशा याःगु दु ।