जि ल्यासे हे तिनि

बलिउड अभिनेता अजय देवगण व वया कलाः काजोलया वैवाहिक जीवन बांलाक न्ह्यानाच्वंगु खँय् शंका मदु । थुपिं निम्हतिपुलिं मौका लाइगु इलय् छम्हं मेम्हेसित हिस्यायेगु धाःसा त्वःफिकीमखु । उकिं अजय व काजोलया तिपूजीवन थौंतक नं बलिउडय् छगू नमूना जुयाच्वंगु दु । अले इमिगु वैवाहिक जीवन नं सुखदपूर्ण रुपं हे न्ह्याः वनाच्वंगु दु ।

मौका लाइगु इलय् छम्हं मेम्हसित हिस्यायेत लिफः मस्वइपिं थुपिं निम्ह तिपुलिं लिपांगु इलय् छम्हं मेम्हेसित आरोप प्रत्यारोप यायेगु ज्याय् तकं कुहां वःगु दु । चर्चित निर्देशक करण जोहरं संचालन याना वयाच्वंगु टेलिभिजन ज्याझ्वः ‘कफि वीथ करण’या खुगूगु संस्करण सम्भवतः थुपिं निम्हतपू न्हापांखुसी थ्यंगु खयेमाः ।

(काजोल थ्व स्वयां न्ह्यः नं करणया थुगु ज्याझ्वलय् थ्यने धुंकूगु दु ।)ज्याझ्वलय् खँल्हाबल्हाया झ्वलय् अजय देवगणं ‘जितः फोटो कायेत छुं नं समस्या मदु, जबकि समस्या थनथाय् लाक्क वइ कि काजोल फोटो काये धुंकाः कम्तिं नं ३ घन्टा उकियात सम्पादन यायेगु ज्याय् व्यस्त जुयाच्वनी । अले जक सामाजिक संजालय् सेयर याइ ।’ धकाः धाःगु खः ।

‘ल्यासे जुयाच्वंबलय् ला वयात अज्याःगु खँय् खास हे मतलब मदु, तर आः बुढेसकालं थीवं वयात अज्याःगु ल्वचं कया वःगु खः ।’ अजय नं धाःगु खः । अजयया थुकथंया प्रतिक्रिया खनाः तसकं तम्वःम्ह काजोलं ‘थः बुरा जूगु मखं, मेपिंत धयाच्वनी । जि ला अझ नं जवान तिनि’ धकाः लिसः बिउगु खः । अजयया खँ न्यनाः काजोल तसकं तम्वःगु खः ।