संकिपाय् नांया अभाव

खय् भाय्या संकिपाया नां तयेत हे आः समस्या जुया वःगु थें खनेदु । मानौं आः खय् भासं दयेकीगु संकिपाया नां तयेत हे अभाव जूगु दु । लिपांगु इलय् छगू संकिपा निर्माण यायेगु घोषणा जुल, संकिपा नां ‘दाल भात तरकारि’ हँ ! मह संचारं निर्माण यायेत्यंगु संकिपाया नां खः दाल भात तरकारि । थ्व स्वयां न्ह्यः मह संचारं हे निर्माण याःगु संकिपाया नां ‘शत्रु गते’ ।

थय्क स्वयेबलय् गनं नेपाली संकिपाया नां तयेत खँग्वः हे मंत ला धइथें च्वं । गुलि संकिपा ला छगू हे नामं धमाधम दयेका वयाच्वंगु दु । खतुं थथे छगू हे नामं निगू स्वंगू संकिपा दयेकेगुयात संकिपाया हे भासं धायेगु खःसा ‘सिक्वेल’ धकाः धाइ । तर नेपाःया खस भाय्या संकिपा ख्यलय् छगू हे नामं निगू स्वंगूनिसें न्यागू तक संकिपा निर्माण जुइधुंकूगु दुसां थुकिया सिक्वेल हे खः धकाः धाये थाय् मदु धाःसां जिउ ।

थःगु संकिपायात सिक्वेल धकाः धायेगु खँय् खय् भाय्या संकिपाकःमितय् दथुइ हे अन्यौलता दु थें च्वं । खालि थःगु हिट संकिपाया लबः कायेगु निंतिं जक सिक्वेल धइगु नां बियाः छगू हे नामं थीथी संकिपा निर्माण यानाच्वंगु थें च्वं । अथे ला गुलिखे निर्मातातय्सं छगू हे नामं न्यागू न्यागू संकिपातक निर्माण यायेधुंकूगु दु । गनं संकिपा निर्मातातय्त थःगु संकिपाया नां तयेगु निंतिं खँग्वः वा नां हे मंत ला धकाः नं धायेगु याना हयाच्वंगु दु ।

संकिपाकःमि विकास आचार्यया ‘नाइ नभन्नु ल’ या नामं न्यागू संकिपा निर्माण जुइधुंकूगु दु । नाइ नभन्नलु लनिसें नाइ नभन्न लु–५ तक थ्यने धुंकल ।खतय्तला खय् भाय्या संकिपा दयेकीपिं निर्मातातय्सं थःगु संकिपाया नां विदेशी संकिपा विशेष यानाः बलिउडपाखें नां त्यासा कयाः तयेगु याना मच्वंगु नं मखु । गुलिखे संकिपा निर्मातातय्सं बलिउड संकिपाया नां जक त्यासा कायेगु मखसे बाखंचु (स्क्रीप्ट)तकं त्यासा कायेगु व बलिउड संकिपाया नक्कल यानाः नं खय् भाय्या संकिपा दयेकाच्वंगु दु ।

हालय् प्रदर्शन जूगु केकि अधिकारीया ‘कोहलपुर एक्सप्रेस’, ‘झमकबहादुर’ बलिउड संकिपा ‘मुम्बइ एक्सप्रेस’ नक्कल धकाः धाइ । शोभित बस्नेतया ‘धुम–२’ नांजक बलिउडया मखसे बलिउड संकिपा ‘कुँवारा बाप’या नक्कल खः । बलिउड संकिपाय् मेहमुदया चरित्र धुम–२ लय् जयकिशन बस्नेत म्हितूगु खः । बलिउडय् धुम–३ संकिपा नं निर्माण जुइधुंकूगु दु ।

नेपालय् खय् भाय्या संकिपा निर्माण जूगु न्यागू दशक स्वयां अप्वः दयेधुंकल । अय्नं आतकं बलिउडया प्रभाव तंगु मदुनि अथवा धाये त्वःते फुगु मदुनि । आतक नं बलिउडया प्रभाव वा लिच्वः नेपाःया खय् भाय्या संकिपा ख्यलय् लानाच्वंगु हे दनि । खय् भाय्या संकिपाकःमित नं बलिउडया संकिपाया प्रभावं मुक्त जुइ फुगु मदुनि । धायेगु हे खःसा बलिउडया प्रभावं मुक्त जुइपाखें इमिसं ध्यान हे बियाच्वंगु मदु धाःसां जिउ ।

खय् भाय्या संकिपाकःमितय्गु खँ ल्हायेगु खःसा थ्व ख्यलय् सनाच्वंपिं गुलिखे संकिपाकःमित ‘पढेर भन्दा परेर जानेकाहरू’ धायेथें अज्याःपिं हे अप्वः खनेदु धकाः धायेगु याः सरोकारवालातय्सं । शायद थथे जूगुलिं नं खय् भाय्या संकिपाकःमितय्सं विदेशीतय्गु संकिपाया अनुशरण जकं यानाच्वंगु खःकि ! खय् भासं निर्माण जुइगु संकिपा जक मखसे खय् भाय्या हे संकिया ख्यःयात कयाः जुइगु थीथी गतिविधि नं विदेशीतय् हे अनुशरण यानाच्वंगु नं खनेदु ।

थ्व हे झ्वलय् लिपांगु इलय् खय् भाय्या संकिपा ख्यलय् छगू हे नांया थीथी संकिपा निर्माण यायेगु क्रम तीव्र रुपं जुयाच्वंगु खनेदु । न्हूगु संकिपाया नां तयेगु निंतिं खँग्वः मदयाः खः वा थःगु संकिपा सिक्वेल धकाः क्यनेत खः । वा थःगु हिट जूगु संकिपाया लबः कायेत खः । सीके फुगु मदुनि । अथे ला संकिपा निर्माण याइपिंसं थःगु हिट संकिपाया नामं थीथी संकिपा निर्माण यानाच्वंगु नं खनेदु ।

संकिपा निर्माता विकास आचार्यया हिट संकिपा ‘नाइ नभन्नु ल’ नामं उकिया लबः कायेकथं ‘नाइ नभन्नु ल–५’ तक छगू हे नामं संकिपा निर्माण यायेधुंकूगु दु । निर्देशक शोभित बस्नेतं ‘धुम’ निसें ‘धुम–३’ अथे हे सुदर्शन थापां प्रेम गीत’ व ‘प्रेम गीत–२’ अथे हे छगू इलय् अतिकं लोकंह्वमाःम्ह नायिका झरना थापा ‘ए मेरो हजुर–२’ हिट जुइवं आः मेगु संकिपा ‘ए मेरो हजुर–३’ निर्माण यायेगु झ्वलय् दु ।

थुकथं हे खय् भाय्या संकिपाया इतिहासय् दकलय् अप्वः व्यापार यायेत सफल जूगु धकाः अतिकं बय्बय् जूगु संकिपा ‘छक्का पञ्जा’या नामं ‘छक्का पञ्जा–३’ तक निर्माण जुयाः नं प्रदर्शनय् वयेधुंकूगु दु । छक्का पञ्जा दकलय् अप्वः हिट जूगुलिं हे थ्व संकिपाया नामं मेगु संकिपा निर्माण जूगु खः धाःसां जिउ । थ्व संकिपा टेलिभिजनया पर्दाय् लोकंह्वाःपिं हास्य कलाकारतय्सं निर्माण याःगु संकिपा खः ।

खय्तला संकिपाया नां संकिपाया बाखं (स्क्रीप्ट)नाप मिले जुइक तयेमाःगु खः । मेखे लिपांगु इलय् अप्वःथे खय् भाय्या संकिपा ब्यापारया ल्याखं असफल जुया वनाच्वंगु खनेदु । गुलिखे संकिपा धाःसा व्यापारया ल्याखं ठिकठाक जक दु धाःसां जिउ । शायद थ्व हे कारणं खय् भाय्या संकिपा निर्मातातय्सं संकिपाया नां दोहोरे तेहरे यानाः निर्माण यायेगु यानाच्वंगु खयेमाः धायेछिं !