केन्याय् नीछम्ह नेपाली मिस्तय् उद्धार
येँ औ अफ्रिकी देय् केन्याय् मी हयातःपिं नीछम्ह नेपाली मिस्तय्त स्थानीय प्रहरीं उद्धार याःगु दु । केन्याया प्रहरीं राजधानी नेरोबीइ च्वंगु निगू नाइट क्लबं उमित उद्धार यानागु खँ धाःगु दु । नेरोबीं पिने लाःगु निगू नाइट क्लबय् छापा मारे यानाः नेपाली मिस्तय्त उद्धार यानागु खँ प्रहरीं धाःगु खः ।
प्रहरीं उमित देहव्यापारया निंतिं केन्याय् मी हयातःगु खँ धाःगु दु । मिस्तय्त मीउगु द्वपनय् प्रहरीं स्वम्हेसित नं ज्वंगु दु ।
आः स्थानीय प्रहरीं मानव बेचविखतया अन्तर्राष्ट्रिय गिरोह लिसे उमिगु सम्बन्धयात कयाः छानविन यानाच्वंगु खँ धाःगु दु ।
थौंकन्हय् नेपाली मिस्तय्त भारत व अरब मुलुकय् जक मखु अफ्रिकाय् थ्यंक मीगु ज्या जुयाच्वंगु खँ मिसा व मस्तय् निंतिं ज्या यानाच्वंपिं अधिकारकर्मीतय्सं धाःगु दु । खुला न्ह्यव जक नं केन्याया हे मोम्बासा शहरं न्हय्म्ह नेपाली मिस्त व स्वम्ह भारतीय मिस्तय्त उद्धार याःगु खः ।
अफ्रिकी देशय् मिइ यंकीपिं मिस्तय्त अप्वः यानाः अनया डान्सबार तयाः यौनधन्दा यायेत बाध्य याइगु खँ धाःगु दु । नेपालं दँय्दसं द्वलंद्वः मिस्त व मस्तय्त भारत व मेमेगु देशय् मी यंकेगु जुयाच्वंगु दुसा आः मिसा मीपिं गिरोहतय्सं अफ्रिकी देशय् तक थ्यंकेगु यानाच्वंगु खँ अभियानकर्मीतय्सं धाःगु दु ।
नेपालं भारतय् मीयंकीपिं मिसामस्तय्त याकनं तःधिकः यायेगु निंतिं हर्मोन अप्वयेकीगु थीथी वासः व इन्जेक्सेन तकं बीगु यानाच्वंगु खँ पिहां वंगु दु ।
छुं न्हि न्ह्यव भारतय् उद्धार याःम्ह छम्ह मिसां थःत च्यादँ दुबलय् हे बांलाःगु ज्या चूलाकाबीगु धकाः नेपालं भारतय् हःगु व थन वासः नकाः याकनं तःधिकः यानाः यौनकर्मी दयेकूगु बयान बिउगु खः ।
LEAVE YOUR COMMENTS