एनओएया कार्यवाहक नायः पुष्कर प्रजापति

येँ – अमेरिकाय् च्वंपिं नेवाःतय्गु संगठन नेवाः अर्गनाइजेशन अफ अमेरिका (एनओए) या कार्यवाहक नायः पदय् वहे संस्थाया प्रथम न्वकु पुष्कर प्रजापति नियुक्त जुयादीगु दु । एनओएया नायः बबिता श्रेष्ठ प्रधानं व्यक्तिगत कारण क्यनाः पदं राजीनामा बियादीगुलिं प्रजापतियात कार्यवाहक नायः ल्यःगु खः ।

नायः बबिता प्रधान श्रेष्ठं वंगु बाःछि न्ह्यः राजीनामा बियादीगु खः । वय्कःया कार्यकाल स्वदँया खःसां नायः निर्वाचित जुयादीगु दछि पुलेवं वय्कलं राजीनामा बियादीगु खः । थनिं १७ दँ न्ह्यः पलिस्था जूगु नेवाः अर्गनाइजेशन अफ अमेरिकाया इतिहासय् मिसाम्ह नायः जुयादीगु वय्कः न्हापांम्ह खःसा बहालवाला नायःपाखें दथुइ हे राजीनामा बिउगु नं थ्वहे न्हापांगु घटना खः ।

एनओएया कार्यसमितिं मय्जु प्रधानया राजीनामा स्वीकृत यासें वय्कलं थःगु कार्यकालय् यानादीगु ज्याया लागिं सुभाय् देछाःगु दु ।
विश्वन्यंकंया नेवाःतय्गु मंकाः संगठन वल्र्ड नेवाः अर्गनाइजेशन (हलिं नेवाः दबू) गठन यायेगु ज्याय् मू भूमिका दुगु संस्थात मध्ये एनओए नं छगू खः । वल्र्ड नेवाः अर्गनाइजेशनया वर्तमान नायः सिजन श्रेष्ठ नं न्हापा एनओएया हे अध्यक्ष जुयादीम्ह खः ।