ने. सं. ११४४ चौलाथ्व दशमी -

टेम्पो व जेट विमान

‘जिमिगु पार्टी ट्याम्पु पार्टी मखु । घितिघिति । भट्भटे । छम्ह चालकं लुया यंकीगु । जिगु दल ला जेट विमान खः । भव्य । विशाल । निपुणम्ह पाइलटतसें हाँके याइगु ।’ थःगु दलयात विशाल जेट विमानलिसे लनी । तःधंगु सन्तोष व गौरवया सासः ल्हाई । निम्ह अध्यक्ष दुगु थःगु नवगठित पार्टीयात जेट विमानलिसे लनी । समान खंकी । ट्याम्पुया गतिं न्ह्यानाच्वंगु देय् ।

आः जेट विमानया गतिं न्ह्याइ । देय् आः योग्य व दक्ष पाइटलटतय् ल्हाती लायेधुंकूगु दु । देशं आः गति काइ । उच्चाइ काइ । अभूतपूर्व प्रगतिया गन्तव्यपाखे देय् उन्मुख जुइ । वाम एकता लिपाया थःगु पार्टीयात जेट विमानलिसे तुलना यासें पार्टीया छम्ह क्याप्टेन, पाइलटं काब्यात्मक शैलीं थःगु दलया पहिचान बी । चित्रण याइ ।

जेट विमानय् निम्ह चालक अनिवार्य जुइ । ट्याम्पु थें छम्ह सामान्य चालकं जेट विमान ब्वयेके फइमखु । नवगठित जेट पार्टीइ निम्ह अध्यक्ष दइ । निम्हं पाइलटं जेट पार्टी हाँके याइ । पार्टीइ निम्ह अध्यक्ष छाय् अनिवार्य ? थुकिया औचित्य प्रमाणित यासे तर्क पेश याइ । छगू हे दलय् निम्ह अध्यक्ष ? ! प्यखेरं शंका उपशंका ब्वलनी ।

खिचात थें ल्वाइगु जकं खःला ? पिनें एकता धाःसां दुनें दुनें अनेक हे जुयाच्वनीगु खःला ? चिरचिर बाया च्वनीगु खःला ? थज्याःगु हे शंका चिइकेत जेट विमानया विम्ब मार्फत् थःगु पार्टीया निम्हं अध्यक्षं जेट विमानया पाइलटद्वयं थें पार्टी संचालन याइ ।जेट विमानय् पाइलटद्वय दथुइ हानथाप जुइमखु । हानाहान वा तानातान जुइमखु निम्हं छम्ह । ला व लुसि थें जुइ ।

जेट विमानया विम्बं च्वये च्वये आकाशय् ‘शयर’ याये दइगु कल्पनां जनता उमंगित जुयाच्वंगु दु । घितिघिति ट्याम्पुइ च्वनाः उखेथुखे जुयाच्वंपिं धरतीपुत्र देशवासीत । आः विमानय् च्वनाः आकाशय् ब्वये दइ, जनताय् लय्ताःया खुसि बाः वइ ।

निम्हं अध्यक्षं ल्वानाः मखु जानाः पार्टी न्ह्याकी । जेट विमानया छम्ह गुरुजीं पार्टीया एकताप्रति छुं हे शंका आशका मयायेत इनाप याइ । देय् व जनता आः जेट विमानय् च्वनाः द्रुत गतिं न्ह्याइ । थौंकन्हय् । जेट विमानया विम्बं च्वये च्वये आकाशय् ‘शयर’ याये दइगु कल्पनां जनता उमंगित जुयाच्वंगु दु । घितिघिति ट्याम्पुइ च्वनाः उखेथुखे जुयाच्वंपिं धरतीपुत्र देशवासीत ।

आः विमानय् च्वनाः आकाशय् ब्वये दइ, जनताय् लय्ताःया खुसि बाः वइ ।फय्या मार्ग लिनाः विकासया लँय् वने दइ । जनताया नुगलय् स्वां ह्वइ ।प्रकृतिं मानव शरीरय् अनेक अंगत छुना हःगु दइ । तर गुगुं छगू, छता जक । गुगुं निता, निथी । मिखा निगः, न्हाय्पं निपा, किड्नी निगः, ल्हाः, तुति नं निपा हे दइ । तर मुटु, छगः, स्येँ (लिभर) छगः, यौनाङ्ग, न्हाय्, म्हुतु धाःसा छगू छगू हे जक दइ ।

मिखा छगः स्यंसा मेगु मिखां ज्या बी । अथे निथी दुगु अंगतसें छगुलिं ज्या मबिउसां मेगुलिं ज्याबी । तर छता, छथी जक दुगु अङ्ग स्यन कि उकिया विकल्प दइमखु । शरीरय् उकिं खतरा अप्वयेकी । प्रकृतिं छाय् शरीरय् हरेक अङ्गत निथी, स्वथी मबिल ? छाय् निगः मुटु छुना मबिल ? जिज्ञासा लुइ । वाम एकता लिपा गठित पार्टीया निम्ह अध्यक्ष लुमनी ।

निगः मिखा, निपा न्हाय्पं, निगः किड्नी, निपा ल्हाः, निपा तुति थें ताइ ।खतुं थौंकन्हय् वैकल्पिक व्यवस्था, दर्शनया उदय जुयाच्वंगु दु । छम्ह सेलिब्रिटी मय्जुं शंखनाद थ्वयेकी, ‘मिजंतय्सं निम्ह कलाः तये जिउसा, जिं नं निम्ह मिजं (भाःत) तयाः क्यने ।’ निम्ह पाइलट व जेट विमानया खँ थन नं वइ । छम्ह जक भाःतं गाकाच्वनेबलय् उम्ह मय्जुं थःत ट्याम्पु थें तायेकल ला ? मसिउ ! निम्ह पाइलटं ब्वयेकीगु जेट विमान जुयाः आकाशय् ब्वयेगु इच्छा मय्जुया नुगलय् तीव्र जुइ ।

निम्ह भाःत तयेगु घोषणा याइ । थौंकन्हय्या आधुनिक बाखंच्वमि मय्जुपिंसं बाखं मार्फत् अतिरिक्त श्रीमान्, वैकल्पिक श्रीमान्या पक्षय् वकालत याना हयाच्वंगु दु । शायद बहुचालक दुगु जेट विमानया विम्ब पाखेरया आकर्षण खःला थ्व ?टयाम्पु थेंज्याःगु जीवनलिसेया वितृष्णा खःला ? वाम एकतावद्ध दलया निम्ह अध्यक्षत खनी । बहुपति व्यवस्था, संस्कृति लुमनी ।

खय्तला गबलें गबलें निगः छ्यं म्ह छगू हे जक दुम्ह मनू नं लुमनी । अझ उकुन्हुतिनि निथी पुरुषलिंग दुम्ह मचा फेसबुकय् खनी । अनसं निम्ह पाइलट दुगु जेट विमान नं लुमनी । ‘जिमिगु पार्टी ट्याम्पु मखु,जेट विमान, निम्ह पाइलटं न्ह्याकीगु ।’ वाम एकतां विकसित पार्टीया छम्ह अध्यक्षया हुँकार न्हाय्पनय् थ्वइ ।तर मतिं मतिं धाइ व निगू लिंग दुम्ह मचा, जीवन गथे यानाः न्ह्याकी ? उलि सहज जुइला ? मजुइला ?