११ दँया स्कूल जीवनय् छन्हु हे गयल मदु

निर्मल वज्राचार्य

येँ- स्कूल वनेगु उमेरया झी मस्तय्सं इलय् ब्यलय् थीथी त्वहःचिनाः स्कूल मवनेगु ज्या याना हे च्वंगु दइ । मांअबुया लागिं थ्व छगू कपाः स्याःगु विषय जुयाच्वनी ।

तर झीगु देशय् छुं विद्यार्थी अज्याःपिं विद्यार्थीत नं दु गुपिं थःगु ११ दँ ताःहाकःगु स्कूल जीवनय् गबलें छन्हु तक हे गयल मजू । युकेजीनिसें १० कक्षा तकया पढाईलय् छन्हु हे गयल मजूम्ह अज्याःम्ह हे छम्ह विद्यार्थी खः प्रत्युषराज शाक्य । येँया वतु भुजिंबहालय् च्वनीम्ह प्रत्युष डल्लुस्थित स्वर्णिम स्कूलया विद्यार्थी खः । प्रिस्कुलंनिसें कक्षा १० तक अन हे अध्ययन याःम्ह प्रत्युष थुगुसीया एसईई परीक्षा ३.९५ जीपीए हयाः उत्तीर्ण जूगु दु । प्रत्युषं प्याब्सनं काःगु परीक्षाय् धाःसा ४ जीपीए हःगु खः ।

प्रत्युषया बौ पूण्यराज शाक्यं थः काय छन्हु हे गयल मजूगु युकेजीनिसें १० कक्षा तकया मार्कसिट क्यँसें धयादिल, ‘५ कक्षाय् १०२ ज्वरो वःबलय् थौं छन्हु स्कूल वने म्वाःल धयां नं ख्वयाः हे स्कूल वन । न्ह्याबलें न्हाप जुइगु जुयाः प्रत्युषं १ निसें १० कक्षा तक पूवंक हे छात्रवृत्ति कयाः ब्वन । वयागु विद्यार्थी जीवनय् दकलय् कम ल्याः वःगु धइगु हे कक्षा ६ लय् प्राप्त जूगु ९३.९६ प्रतिशत खः ।

स्कूलपाखें काययात ‘स्वर्णिम ट्रेजर’या रुपय् सम्मान याःगुली लसता प्वंकुसें शाक्यं प्रत्युष कासाय् नं उतिकं पोख्तम्ह जूगुलिं बास्केट बल कासाय् ‘म्यान अफ दि म्याच’ उपाधी काःगु प्रशंग नं कुलादिल ।

उलि जक मखु, क्यालकुलेटर स्वयां याकनं जोड, घटाउ, गुणा र भाग याये फइगु अबाकस उपकरण छ्यलाः हिसाब यायेगु देशव्यापी गणितीय प्रतियोगिताय् नं प्रत्युषं लिउ वा लियां लिउ स्थान कायेगु यानाच्वंगु खः ।

कायया बारे प्रत्युषया मां तिमिला शाक्यं नं धयादी, ‘झी नेवाःतय् ला बाःछिइ छक्वः नखःचखः वयाच्वनी, गबलें थःतिथिपिंथाय् वने मालाच्वनी, अज्याःबलय् नं वयात स्कूल वने हे माः । धन्न जिमि संयुक्त परिवार जूगुलिं जिमि मलाःसा वया तःबा, तःमां, कका, काकी, दाजु, ततापिंसं स्कूल त्वःता थकी । उकिं नं व छन्हु हे गयल मजूगु खः । थ्व खँय् ला जिमित गर्व हे दु । अय्नं नखःचखःबलय् तकं वया न्ह्यइपुके मखंगुली छता धाःसा गर्खेसे धाःसा च्वं ।’

सम्बन्धित बुखँ

LEAVE YOUR COMMENTS