ने. सं. ११४४ चौलागा पारू -

दकलय् कान्छा गोलस्कोरर

विश्वकप फुटबल मात्र छगू फुटबल व विश्वकप त्याकेगु जक उद्देश्यं जक जुयाच्वंगु मदु । विश्वकपय् अनेकौं थीथी कीर्तिमान कायम यायेगु ज्या नं जुयाच्वंगु दइ । थ्व झ्वलय् विश्वकपय् दकलय् म्हो उमेरय् गोल याःम्ह कासामिया रुपय् कीर्तिमान तयेत सफल जूगु दु फ्रान्सया केलियन एम्बेपे ।

रुसय् न्ह्यानाच्वंगु विश्वकप फुटबल अन्तर्गत ग्रुप ‘बी’या समूह चरण अन्तर्गतया निगूगु चरणय् पेरु विरुद्धया कासाय् गोल याःम्ह् एम्बेपे विश्वकप फुटबलया इतिहासय् गोल याःम्ह दकलय् कान्छा कासामि जूगु दु । मात्र १९ दँ १८३ न्हुया दुने एम्बेपें गोल यानाः थ्व कीर्तिमान तःगु खः ।

थ्व ल्याखं स्वयेगु खःसा एम्बेपे जन्म जूगु दँ सन् १९९८ य् खःसा थ्व इलय् विश्वकप फ्रान्सय् हे जुयाच्वंगु अले विश्वकप नं त्याकूगु खः । फ्रान्स विश्वकप–१९९८ या इलय् एम्बेपेया जन्म जूगु खः ।

म्ह्याय्या ख्वाः स्वयेत विमान चार्टर्ड

विश्वकप म्हितेत रुसिया वनाच्वंम्ह डेनमार्कया कासामि जोनास क्नुडसनं विमान हे चार्टर्ड यानाः थः म्ह्याय्या ख्वाः स्वयाः हाकनं रुस लिहां वःगु दु । विश्वकप फुटबलया निंतिं डेनमार्कया कासामि क्लुडसनं थः जहान ट्रिनीं म्ह्याय् बुइकूगु खँ सीवं विमान चार्टर्ड यानाः

म्ह्याय्या ख्वाः स्वयाः हाकनं रुसय् लिहां वःगु खः ।

चिकित्सकतय्सं बियातःगु ई स्वयां न्ह्यः हे ट्रिनीं मचा बुइकूगु खःसा उकिया जानकारी विश्वकप म्हितेत रुस वनाच्वंम्ह भाःत क्लुडसनयात वःगु खः । जारी विश्वकपय् समुह चरणया न्हापांगु कासा सिधयेवं डेनमार्क वनेत्यंम्ह वयात विमान चार्टर्ड यायेत वया हे पासापिंसं तकं ग्वाहालि याःगु खः ।

डेनिस कासामि क्लुडसनं थः म्ह्याय्या ख्वाः स्वःवंगु जक मखु, नकतिनि बूम्ह ह्याउँमचा थः म्ह्याय्यात डेनमार्कया जर्सी तकं यंका बिउगु खःसा वया कलातं उगु जसी काःगु किपा इन्स्टग्रामय् नं सार्वजनिक याःगु खः ।

विश्वकप ट्रफी दुने लागू वासः

सकसिनं सिउ विश्वकप ट्रफी शुद्ध लुँया जुइ । अले थ्व विश्वकप त्याकेगु हरेक देय्या म्हगस नं खः । विश्वकप ट्रफी थःगु क्वथाय् छायेपिया तयेगु सुया मइ । थ्व हरेक देय्या जक मखसे प्रत्येक फुबलप्रेमीया नं म्हगस खः । उकिं हे जुइ विश्वकपया नमूना ट्रफी (नक्कलि ट्रफी) बजारय् न्यायेगु दु ।

यदि छिं छम्ह नं फुटबलया प्रशंसक खः अले थःगु क्वथाया शोभा अप्वयेकेगु खःसा विश्वकप ट्रफीं हयेगु ल्वःमंकादीमखु । तर थथे याये न्ह्यः छकः विचाः यानादिसँ कि उगु ट्रफी नक्कलि हे जूसां वैध खः वा अवैध खः ? छाय्कि तस्करतय्सं विश्वकपया नक्कलि ट्रफी दुने लागू वासः तयाः तस्कर यायेगु यानाच्वंगु दु ।

थज्याःगु हे छगू गिरोहयात अर्जेन्टिनाया प्रहरीं ज्वंगु दु । प्रहरीया पुचलं नक्कलि ट्रफी दुने सुचुकाः तस्कर यायेत्यंगु १.५ किलो कोकिनलिसें उगु गिरोहया खुम्हेसित नं ज्वंगु दु ।

सन् २०१८ या विश्वकप ट्रफीया दुरुस्त नक्कल यानाः दयेकातःगु नक्कलि विश्वकप ट्रफी दुने लागू वासः तयाः तस्कर यायेत तयारी यानाच्वंगु इलय् प्रहरीं इमित नियन्त्रणय् काःगु खः ।