अस्पतालय् मखुगु हि थनाबिउगुलिं निगलं किड्नी फेल
येँ – अस्पतालय् हे मखुगु समूहया हि थना बिउगुलिं छम्ह विरामी निगलं जलास्येँ (किड्नी) फेल जूगु दु । नेपालगञ्जया भेरि अञ्चल अस्पतालय् थिइ मजिउ जूबलय् तसकं हि कुहांवःगुलिं भर्ना जूवःम्ह बर्दियाया २२ दँया रुमा थारुयात मखूगु समूहया हि थनाबिउगु खः ।
रुमायात वंगु पुस २१ गते अस्पताल भर्ना याःगु खः । उकुन्हु बहनी हे वयात ओ पोजिटिभया छप्वः हि बिल । कन्हय्कुन्हु हाकनं हि बीत वया अबु नेपाल रेडक्रस सोसाइटीया क्षेत्रीय कार्यालयय् हि काःवन । अन वयात ओ पोजिटिभया पलेसा बी पोजिटिभया हि बियाहल । बी पोजिटिभया हि काःवःम्हेसित धाःसा ओ पोजिटिभ बियाछ्वल । अबुम्हेस्यां ज्वना वःगु हि अस्पतालया नर्स छुं परीक्षण हे मयासे विरामीयात थनाबिउगु खः ।
हि थना बिइवं विरामीया म्हय् फ्वंफ्वं गायावःगु खः । अस्पतालं आः रुमाया निगलं किड्नी फेल जूगु खँ धाःगु दु ।
अस्पतालया मेडिकल सुपरिटेन्डेन्ट डा. कृष्ण आचार्यं नर्सया लापरवाहीया कारणं विरामीया स्वास्थ्य स्यंगु खँ स्वीकार यानादीधुंकूगु दु । निवाः न्ह्यव हे थ्व घटना जूगु खःसां म्हिगः जक सार्वजनिक जूगु खः । डा. आचार्यं विरामीयात ठीक यायेफइ ला धकाः निवाःतक गोप्य यानाः उपचार यानाच्वनागु खँ धयादीगु दु ।
मखुगु हि थनाबिइवं अस्पतालं थःगु हे खर्चं वासः यानाच्वंगु खः । तर आः भेरी अस्पतालय् विरामी रुमाया उपचार जुइगु सम्भावना मदुगु खँ धाःगु दु । अस्पतालं आः रुमायात वीर अस्पताल रिफर यायेत्यंगु दु ।
परीक्षण हे मयासे हि थनाबिउम्ह नर्सयात धाःसा अस्पतालं निलम्बन यायेधुंकूगु दु । विरामीया अवस्था धाःसा चिन्ताजनक जुया वनाच्वंगु खँ धाःगु दु । ख्वाः मना वयाच्वंगु दु, सह हे याये मफइकथं प्वाः स्याइगु जुयाच्वंगु खँ चिकित्सकतय्सं धाःगु दु । विरामीयात स्याःगु म्हो यायेत कडा वासः बियाच्वंगु खँ धाःगु दु । डा. आचार्य विरामीया अवस्था न्हियान्हिथं खराब जुया वनाच्वंगु खँ धाःगु दु ।
नयाँ पत्रिकापाखें
LEAVE YOUR COMMENTS