स्वयेबहपिं कासामि
सर्जियो रामोस
डिफेन्डर, स्पेन
स्पेनिस टिमया उत्कृष्ट डिफेन्डर खः सर्जियो रामोस । रियल मेड्रिडया कप्तान रामोस आतकया दुने ला लिगा व च्याम्पियन्स लिग त्याकेधुंकूगु दु । नकतिनि क्वचाःगु च्याम्पियन लिगया फाइनल नं रामोसया क्लब रियलं हे त्याकूगु खः ।
क्लब फुटबलय् जक मखु, अन्तर्राष्ट्रिय फुटबलय् नं रामोसया प्रदर्शन बांलाः । रामोसं आःतकया दुने स्वक्व युरो व स्वक्व हे
विश्वकप म्हितेधुंकूगु दुसा व दुथ्याःगु स्पेनं छक्वः विश्वकप व निक्वः युरो कप त्याकेधुंकूगु दु । ३२ दँ दुम्ह रामोसया थ्व प्यक्वःगु विश्वकप खः । थ्व विश्वकपय् रामोसं लिभरपुल स्टार सलाहनापया विवादं यानाः चर्चाय् दु । च्याम्पियन लिगया फाइनलय् थुपिं निम्ह कासामि ल्वाःबलय् सलाह घाःपाः जूगु खः । व हे ल्वापुं थुपिं निम्हेसिया दथुइ विवाद जूगु खः ।
क्रिस्टियानो रोनाल्डो
फरवार्ड, पोर्चुगल
रियल म्याड्रिड स्टार कासामि रोनाल्डो छम्ह उत्कृष्ट कासामि खः । रोनाल्डो रियलयात च्याम्पियन्स लिग च्याम्पियन दयेकेत प्रमुख भूमिका म्हितूम्ह खः । न्याक्वः तक बालन डे ओर (फिफा उत्कृष्ट कासामि) त्याकूम्ह रोनाल्डो निम्हम्ह कासामि खः । वं बाहेक मेस्सी हे जक न्याक्वः तक बालन डे ओर त्याके दु । निदँ न्ह्यः रोनाल्डों थःगु कप्तानीइ पोर्चुगलयात युरोकप त्याकाबिउगु खः ।
सन् २०१६ य् जूगु युरोकपया फाइनलय् रोनाल्डोया टिमं फ्रान्सयात बुकाः युरो कप ल्ह्वंगु खः । ३३ दँ दुम्ह रोनाल्डों आःतक विश्वकप धाःसा त्याकेफुगु मदुनि । रोनाल्डोया निंतिं थ्व अन्तिम विश्वकप जुइफु । पोर्चुगलयात युरो च्याम्पियन दयेकूम्ह रोनाल्डों आः पोर्चुगलयात विश्वकप च्याम्पियन दयेकेत लिफः स्वइमखु ।
LEAVE YOUR COMMENTS