ने. सं. ११४४ कौलाथ्व पारू - नःलास्वनेगु

‘निर्यातय् अनुदान बिउसां अप्वयेके फइगु अवस्था मदु’

येँ – सरकारं निर्यातय् ५ प्रतिशत तक अनुदान बिउसां नं निर्यात वृद्धि जुइ मफइगु खँ धाःगु दु । साउथ एसियन फोरमया अध्यक्ष सुरेश प्रधानं नेपालभाषा टाइम्सलिसें खँ ल्हायेगु झ्वलय् उगु खँ धयादीगु खः । सरकारं थुगुसिया बजेटय् निर्यातय् ५ प्रतिशत तक अनुदान बीगु व्यवस्था याःगु खः ।

वय्कलं निर्यात अप्वयेकेगु निंतिं नेपालय् माक्व प्राविधिक जनशक्तिया लिसे साधारण जनशक्ति तकं मदुगु खँ धासें ज्या याइपिं हे मदयेक निर्यात अप्वयेकेगु खँ तसकं थाकूगु खँ जूगु कनादीगु दु ।

निर्यात अप्वयेकेगु खःसा सरकारं अनुदानया प्रतिशत जक अप्वयेकेगु मखुसे आयात नं प्रतिस्थापन यायेमाःगु खँ नं वय्कलं धयादीगु दु । लिसें वय्कलं नेपालं थीथी देशय् निर्यात यायेगु खःसा निगू पक्षीय राष्ट्र दथुइ सम्झौता जुइमाःगु खःसां नं अज्याःगु सम्झौता आपालं देय् लिसे जुइ मफयाच्वंगु खँ कनादिसें धयादी, ‘नेपालं भारत बाहेक मेगु देय् लिसे व्यापारिक सम्झौता याःगु मदुनि, अझ धायेगु खःसा सार्क राष्ट्र दथुइ हे थज्याःगु सम्झौता जूगु मदुनि ।’

वय्कःया कथं बजार पहुँच दुसां नं कच्चा पदार्थया अभाव, अप्वया वनाच्वंगु ऋण भार आदि कारणं यानाः नं नेपालं निर्यात अप्वयेके फइगु अवस्था मदु । वय्कलं धयादी, ‘नेपालय् जग्गा न्यानाः उद्योग यायेफइगु अवस्था मदु, गामय् वनाः उद्योग चायेकेगु खँ जुइमखु, यदि चायेकल धाःसां नं माक्व जनशक्ति व प्राविधिक मदुगुलिं यानाः ज्या यायेफइगु अवस्था मदु ।’

भारतीय सरकारं निर्यातय् १७ निसें १८ प्रतिशत अनुदान बियाच्वंगु व चिनियाँ सरकारं निर्यातय् २० निसें २१ प्रतिशत अनुदान बियाच्वंगु खँ कनादिसें थुुगुसीया बजेटय् सरकारं जम्मा १ प्रतिशत जक अनुदानया ध्यबा अप्वयेकूगु खँ नं वय्कलं कनादीगु दु ।