ख्वप नपाया थःगु हे पाठ्यसफू तयार

ख्वप – ख्वप नगरपालिकां थःगु लागा दुने लाःगु स्कुलय् थःपिनिगु हे पाठ्यसफू ब्वंकेगु लागिं सफू तयार याःगु दु । तर स्कुलय् ब्वंकेगु धाःसा सुरु मयाःनि । आःयात १ व ६ तगिंया लागिं सफू तयार यानाः विज्ञतय्त अध्ययनया लागिं छ्वया तःगु दु । थ्व सफू थ्वहे जेठं निसें ब्वंकेगु धकाः तयारी यानाच्वंगु खःसां तयारी मगाःगुलिं ब्वंकेज्या छुं भचा लिज्यायेफुगु खँ नं धाःगु दु ।

१ तगिंया लागिं पिकयातःगु सफूया नां ‘ख्वपको पहिचान’ तयातःगु दु । थ्व खस नेपाली भासं च्वयातःगु सफू खःसां थुकी नेवाः भाय्या छुं खँग्वःया परिचय नं बियातःगु दु । लिसें ख्वपय् प्रचलित थीथी जात्रा, संस्कृति, कासा आदि सम्बन्धी पाठ दुथ्याकातःगु दु । सफूया द्यबलय् ‘स्थानीय पाठ्क्रम’ धकाः रञ्जना लिपिं च्वयातःगु दु ।

६ तगिंया सफुली नेपालभाषालिसे स्वापू दुगु थीथी लिपिया परिचय नं बियातःगु दु । लिसें उकी ख्वपया नेवाः समाजया रहनसहन, साहित्य आदिया खँ नं दुथ्याकातःगु दु । थ्व ख्वप नगरपालिकां हे तयार याःगु पाठ्यक्रम खः ।

थीथी विज्ञत च्वनाः हे तयार याःगु खःसां सफूयात अन्तिम रुप बीगु निंतिं हानं विज्ञतय्गु सल्लाह सुझाव कायेगु ज्या जुयाच्वंगु खँ ख्वप नपा सूत्रं धाःगु दु ।थःपिंसं हे पाठ्यसफू तयार यानाः ब्वंकेत्यंगु ख्वप नपा हे नेपाःया न्हापांगु स्थानीय निकाय खः ।

सम्बन्धित बुखँ

LEAVE YOUR COMMENTS