ख्वपय् गंल्वय्या पोजिटिभ लुल

ख्वप – नेपाल क्षयरोग निवारण संस्था ख्वपं गंल्वचं कःपिं मालाः उपचार प्रक्रियाय् हयेगु अभियान अन्तर्गत ब्यासीइ च्वंगु बासु मा.वि.इ निःशुल्क खै परीक्षण शिविर याःगु दु । संस्थां दुगु दँयात गंल्वचं कःपिं मालाः उपचारय् हयेगु अभियान न्ह्याका वयाच्वंगु दु । संस्थाया सभापति राम सिख्वःया सभापतित्वय् जूगु शिविरय् न्हय्न्याम्ह मिसामिजंया खै परीक्षण याःगु खः ।

खै परीक्षणया झ्वलय् निम्हेसिके पोजिटिभ लक्षण खने दुगु संस्थाया सचिव राजेश्वरी शिल्पकारं जानकारी बियादिल । राष्ट्रिय क्षयरोग केन्द्रया सहकार्यय् जूगु थुगु दँया क्षयरोग नियन्त्रण अभियानया झ्वलय् थीथी थासय् जूगु खै शिविर परीक्षणया झ्वलय् आतकया दुने स्वम्हेसिके पोजिटिभ लक्षण लुया वःगु संस्थाया निवर्तमान सभापति बाबुकाजी श्रेष्ठं कनादिल ।

ख्वप जिल्लायात गंल्वचं मुक्त समाज निर्माण यायेगु लक्ष्यकथं संस्थां आतकया दुने प्यंगू विद्यालयय् अभिमुखीकरण व गंल्वय् सम्बन्धी डाटा संकलन नापं प्यंगू थासय् समुदाय दुने निःशुल्क खै शिविर संचालन याये धुंगु संस्थाया कार्यालय सचिव हिरण्यप्रताप सांगामिं कनादिल ।

अभियानया हे झ्वलय् सुलाच्वंपिं ल्वगित पत्ता लगे यानाः ल्वय् लंकेगु अभियानय् विद्यालयस्तरीय व समुदायय् निःशुल्क खै परीक्षण शिविर संचालनया निंतिं संस्थां बिस्कं बिस्कं समूह दयेकाः ज्याझ्वः न्ह्याका वयाच्वनागु संस्थाया सभापति सिख्वं जानकारी बियादिल । लिसें वय्कलं समुदाय दुने अझं सुलाच्वंपिं ल्वगित दयेमाः धइगु आशंका यासें अज्याःपिंत पत्ता लगे यानाः उपचार प्रक्रियाय् हयेमाःगु खँय् बः बियादिल ।

सम्बन्धित बुखँ

LEAVE YOUR COMMENTS