रेमिट्यान्स दुहां वयेगुली सुधार

येँ – नेपाल राष्ट्र बैंकं विदेशं नेपाली ज्यामितय्सं छ्वयाहइगु रेमिट्यान्स दुहां वइगु छुं ई न्ह्यवनिसें सुधार जूगु खँ धाःगु दु । व्यापार घाटा तच्वयाच्वंगु इलय् नेपालय् दुहां वइगु रेमिट्यान्सं नं म्हो जुयाः समस्या वइला धयागु ग्याःचिकु जुयाच्वंगु अवस्थाय् राष्ट्र बैंकया थ्व धापू वःगु खः ।

राष्ट्र बैंकं ज्यामितय्सं औपचारिक माध्यमं ध्यबा छ्वयाहयेगु अप्वःगुलिं रेमिट्यान्स दुहां वयेगुली सुधार खनेदुगु खँ धाःगु दु ।
तर हुण्डी व गैरकानुनी तरिकां ध्यबा दुत हयेगु प्रवृत्ति इलय् हे पनेमफुत धाःसा थ्व सुधार ताःई तक टिके जुइमफइगु खँ अर्थविद्तय्सं धयाच्वंगु दु । छुं ई न्ह्यव निसें रेमिट्यान्स दुहां वयेगु कुहां वनाच्वंगु अवस्थाय् चालु आर्थिक दँया ९ महिना थ्यंबलय् ६ प्रतिशतं अप्वः खनेदुगु खँ राष्ट्र बैंकं धाःगु दु ।

राष्ट्र बंैकया कथं वैदेशिक रोजगारीइ वनेपिं नेपाःमितय् ल्याः म्हो जुयाच्वंगु अवस्थाय् नं वंगु चैत महिनातकया दुने थ्यंमथ्यं ५४० अर्ब तका रेमिट्यान्स दुहांवःगु खँ धाःगु दु ।गुलिखे देशय् ध्यबा छ्वयाहयेगु प्रणालीइ सुधार जूगु व छुं ई न्ह्यव पिहांवःगु लुँ काण्डया कारणंं हुण्डी कारोबार म्हो जुयाः औपचारिक माध्यम रेमिट्यान्सय् दुहां वयेगुली सुधार जूगु खँ राष्ट्र बैंकया डेपुटी गभर्नर चिन्तामणि शिवाकोटीं धयादीगु दु ।

वय्कलं धयादीगु दु, ‘न्हापा २० निसें २५ डलर पुलाः बैंकपाखें ध्यबा छ्वयाहइपिंसं आः मनि ट्रान्सफरपाखें ६–७ डलरं ध्यबा छ्वया हयेफयाच्वंगु दु । मेगु खँ नकतिनि जक पर्दाफास जूगु लुँ काण्डया संयन्त्र तहसनहस जूगुलिं नं रेमिट्यान्स आम्दानी अप्वःगु खः ।’

रेमिट्यान्स आम्दानी अप्वःगुया मेगु कारण अमेरिकी डलर व मलेसियन रिङ्गेटया भाः थहांवंगुलिं नं जूगु खँ धाःगु दु ।
रेमिट्यान्स अप्वयेकेगु खःसा सरकारं संस्थागत रुपं ध्यबा दुत हयेत विनिमय दरय् छुट व सेवा शुल्क म्हो यायेमाःगु लिसें आवश्यक नीतिइ सुधार हयेमाःगु खँ विज्ञतय्सं धयाच्वंगु दु । सरकारं हुण्डीमार्फत वइगु ध्यबायात बैंकिङ प्रणालीइ हये मफुत धाःसा थ्व सुधार ताःहाकः मजुइगु खँ पुलांम्ह गभर्नर दिपेन्द्रबहादुर क्षेत्रीं धयादीगु दु ।

‘थ्व सुधार झी थःपिंसं हे यानाः जूगु थें जितः मताः विदेशपाखें छ्वयाहइगु ध्यबा हुण्डीपाखें वल धाःसा याकनं कायेफइ धयागु दु । बैंकिङ क्षेत्रय् सुधार यायेफत धाःसा रेमिट्यान्स अप्वइ धयागु जितः ताः ।’नेपाःया कुल गार्हस्थ उत्पादनया थ्यंमथ्यं स्वब्वय् छब्व ध्यबा वैदेशिक रोजगारीपाखें हे वयाच्वंगु दु । खाडी मुलुकया तुलनाय् भारत व दक्षिण कोरियापाखें गैरकानुनी रुपं हुण्डीपाखें यक्व ध्यबा दुहां वयाच्वंगु खँ धाःगु दु ।

सम्बन्धित बुखँ

LEAVE YOUR COMMENTS