एमाले–माओवादी एकता घोषणा थौं
येँ – नेकपा एमाले व माओवादी केन्द्रया एकताया घोषणा थौं जुइगु जूगु दु । एमाले अध्यक्ष व प्रधानमन्त्री केपी ओली व माओवादी केन्द्रया अध्यक्ष पुष्पकमल दाहाल प्रचण्ड दथुइ बुधवाः बहनी लिबाक्क तक जूगु वार्ता लिपा बिहिवाः हे पार्टी एकता घोषणा यायेगु क्वःछिउगु खः ।
पार्टी एकता घोषणा लिपा थौं हे निर्वाचन आयोगय् वनाः नेपाल कम्युनिष्ट पार्टी’या नामं एकीकृत पार्टी दर्ता यायेगु सहमति नं जूगु खः ।
पार्टी एकताया निंतिं एमलोया स्थायी कमिटी व माओवादीया सचिवालयया विस्तारीत बैठकं निम्ह नेतातय् दथुइ जूगु सहमतिया अनुमोदन यायेधुंकूगु दु । एमालें बिहिवाः हे केन्द्रीय कमिटीया बैठक नं सःतातःगु दु ।
एकता कार्यदलं २९९ म्हेसिया केन्द्रीय कार्यसमिति दयेकेगु प्रस्ताव यानातःगु दु । थुकी माओवादीं केन्द्रीय कमिटीइ ५० प्रतिशतया माग याना वयाच्वंगु खः । तर निम्ह नेतातय् दथुइ बुधवाः जूगु सहमति कथं माओवादीयात ४५ व एमालेयात ५५ प्रतिशत केन्द्रीय कमिटीइ थाय् दइगु जूगु दु । ओली व प्रचण्ड दथुइ जूगु सहमति कथं एकता लिपा पार्टी केन्द्रीय कमिटी ४४१ म्हेसिया जुइ, गुकी एमालेपाखें २४१ म्ह दइसा माओवादीपाखें निसःम्ह दइ ।
आःयात पोलिटब्यूरो दयेकीमखुसा स्थायी कमिटी ४३ म्हेसिया दयेकी । स्थायी कमिटीइ एमालेपाखें २५ म्ह दइसा माओवादीपाखें १८ म्ह दइ । पार्टी एकता लिपा चुनाव चिं धाःसा सूद्र्यः हे जुइ । थ्व थौंकन्हय् एमालेया चुनाव चिं खः । पार्टीया निर्देशक सिद्धान्त माक्र्सवाद लेनिनबाद जुइ । राजनीतिक कार्यदिशा समाजवाद उन्मुख समावेशी लोकतन्त्र जुइ ।
बिहिवाः एमालेया पुलांम्ह महासचिव मदन भण्डारी व जीवनराज आश्रितया स्मृति दिवस खः । जेठ ३ गते भण्डारी व आश्रित दासढुंगाय् जीप दुर्घटना जुयाः मदुगु खः । एमालें सुथय् मदन आश्रित स्मृति दिवस न्यायेकी । थुकी माओवादीया नेतातय्सं नं ब्वति काइ । थ्व ज्याझ्वः लिपा पत्रकार सम्मेलन यानाः एकता घोषणा यायेगु क्वःछिनातःगु दु ।
LEAVE YOUR COMMENTS