दाङया नेवाःतय् म्हसीका कालबिल ज्याझ्वः

येँ – येँय् च्वनाच्वंपिं दाङया नेवाःतय् दथुइ म्हसीका कालबिल ज्याझ्वः वंगु शनिवाः जुल । दाङ काठमाडौं नेवार समाजया ग्वसालय् उगु ज्याझ्वः जूगु खः । समाजया नायः भेषराज श्रेष्ठया सभापतित्वय् जूगु ज्याझ्वलय् नेवाः देय् दबूया नायः नरेशकुमार ताम्राकार मूपाहांकथं झायादीगु खःसा न्वकु दीपककुमार श्रेष्ठ विशेष पाहांकथं झायादीगु खः ।

थीथी ज्याया निंतिं दांगं येँय् वयाः च्वनाच्वंपिं नेवाःतय्त छप्पँ यायेगु उद्देश्यं गठन यानातःगु समाजया ग्वसालय् जूगु म्हसीका कालबिल ज्याझ्वःया दथुइ समाजया कार्यसमितिया दुजः, आजीवन दुजः व साधारण दुजःपिंत दसिपौ नं लःल्हाःगु खः ।

ज्याझ्वलय् नवासें मूपाहां ताम्राकारं दाङय् नेवाः भाय्, कला, संस्कृतिया पुनर्जागरणया निंतिं देय् दबूपाखें फक्व ग्वाहालि यायेगु जुइ धासें दाङ व येँया दथुइ भौगोलिक रुपं तापाःसां भावनात्मक रुपं एकता क्वातुकेत ताः लाइगु विश्वास प्वंकादिल ।

अथे हे समाजया नायः श्रेष्ठं स्वनिगःया नेवाःतलिसे स्वापू क्वातुका यंकाः दाङय् नेवाः भाय् नापं कला, संस्कृति ल्यंकेया निंतिं माःगु ज्या न्ह्याका वनेगु प्रतिवद्धता प्वंकादिल ।