नेपाल साहित्य मन्दिरया ६५ दँ बुदिं हन

ख्वप – नेपाल साहित्य मन्दिरया ६५ दँ बुदिं सनिवाः भक्तपुर पार्टी भेन्यू गःपलिइ जूगु छगू समारोहया दथुइ नेपालभाषा एकेडेमीया चान्सलर चित्तरञ्जन नेपालीं त्वाःदेवाय् मत च्याकाः उलेज्या यानादिल । ज्याझ्वलय् वय्कलं शताब्दी पुरुष सत्यमोहन जोशीयात थुगुसी हे जक नीस्वंगु प्रज्ञा सम्मान देछायेबियादीगु खः ।

दाता राजाराम जोशीं दां, नापं नायः तिलकप्रकाश कायस्थं दोसल्लां न्ययेकाः मूपाहां चित्तरञ्जन नेपालीं सम्मानपत्र लःल्हासें वय्कःया उगु प्रज्ञा सम्मान लःल्हाःगु खः । ज्याझ्वःया मूपाहां चित्तञ्जन नेपालीं नेपाली भाषा व नेपालभाषाया नं न्ह्यलुवा सत्यमोहन जोशीयात थुगु सम्मान लःल्हाये खंगु थःगु निंतिं हे नं गौरवया खँ जूगु न्ह्यथनादिसें भाषा ख्यःयात तःब्याकेत थज्याःगु सम्मान व सिरपापाखें तिबः जुयाच्वनीगु खँ कनादिल ।

वय्कलं उगु हे ज्याझ्वलय् झिंनिक्वःगु जरिमैंया साखः लुमन्ति सिरपाः च्वमि कृष्णदेवी बज्राचार्ययात लःल्हानादीगु खः । मय्जु कृष्णदेवी बज्राचार्यं थः जहान साहित्यकार परमानन्द बज्राचार्यं पुवंके मफुगु पूधाः प्याखं पुवंका च्वनादीगु खःसा वय्कःया थःगु हे स्वंगू मौलिक सफू पिदनाच्वंगु दु । उगु हे समारोहय् ल्याय्म्ह साहित्यकार अगिब बनेपालीयात थुगुसी हे जक नीस्वंगु कुमार साखः लुमन्ति हःपाः सिरपाः नं लःल्हाःगु खः ।

समारोहय् अभिनन्दित ब्यक्तित्व सत्यमोहन जोशीं नेपाः नं नोवेल सिरपाःया लागिं दावी यायेछिंगु सफूत पिहां वयेफुगु भूमि खः धयादिसें आः नेपालभाषाया च्वनि साहित्यकारतय्सं थःपिसं च्वयागु सफूयात अनुवाद यायेमाः धयादिल । समारोहय् मूपाहां नेपालीं दाता भवानी जोशीया ‘आह्वान÷इनाप’ चिनाखं सफू नं विमोचन यानादीगु खः ।

समारोहय् नेपाल साहित्य मन्दिरया नायः तिलकप्रकाश कायस्थं सभापतिया थासं न्ववानादिसें दाता व साहित्य प्रति अध्यरनरत मनूतय्गु कुतलं मन्दिर ताःलानाच्वंगु कनादिल । नेपाल साहित्य मन्दिरया छ्याञ्जे रामेश्वर भुजू लसकुस यानाः न्ह्याकूगु ज्याझ्वलय् पशुपतिमान पमांनं सुभाय् देछानादीगु खःसा उगु समारोहय् विमोचित सफूया बारे प्रा. कोमलबदन मल्लं न्ववानादीगु खः ।

अथेहे सफूया च्वमि कवयित्री भवानी जोशी, दाता राजाराम जोशी, संस्कृतिविद् तेजेश्वरवाबु ग्वंगः, कृष्णलाल प्रधान, पुरस्कृत ब्यक्तित्व अगिव बनेपालीपिसं थः थःगु नुगः खँ प्वंकादीगु खः ।

सम्बन्धित बुखँ

LEAVE YOUR COMMENTS