जनशक्ति मदयाः वडा तकं प्रभावित

येँ – स्थानीय निकायय् आवश्यक जनशक्ति मदयाः येँ महानगर पालिकाया विकास निर्माणया ज्या समेत प्रभावित जुयाच्वंगु खँ सीदुगु दु । येँ मनपा २० वडाया अध्यक्ष राजेन्द्र मानन्धरया कथं इन्जिनीयर इलय् मवयाः विकास निर्माणया ज्या इलय् क्वचायेके मफयाच्वंगु दु । वय्कलं धयादी, ‘इलय् इन्जिनीयर वइगु मखु, गुकिं यानाः दुगु बजेट हे फुकेत थाकु ।’

प्यलाया दुने निकः जक इन्जिनीयर वःगु खँ कनादिसें वय्कलं धयादी, ‘निलां क्वचाइगु ज्या झिला दयेधुंकाः नं क्वचायेके फयाच्वंगु मदु ।’ वडाय् इन्जिनीयर जक मखु इलेक्ट्रिसियन व कम्प्युटर अपरेटर तकं मदुगु खँ नं वय्कलं कनादी । पूर्वाधार विकास यायेगु निंतिं योजना दयेकाः केन्द्रय् छ्वयां उकिया बारे छु जुयाच्वन थम्हं मसिउगु खँ वय्कलं कनादिल ।

वय्कलं धयादी, ‘जिं झिला न्ह्यः हे दयेकेमाःगु पूर्वाधार व उकियात माःगु १० करोड तकाया बजेट दयेकाः छ्वयागु खः आः छु जुयाच्वन जिं हे मसिउ ।’ थौंकन्हय् बिष्णमुति खुसि सिथय् लिंकरोड स्यनाः गाडी चले यायेत थाकुयाच्वंगु खँ कँसें अन ग्राभेल जक याःसां जनतायात अःपुइगु खँ वय्कलं कनादी । तर थुकिया बारे थम्हं छ्वयागु फाइल नं नगरपालिकाय् गन थ्यनाच्वन वय्कलं मसिउ ।

बिष्णुमति लिंक रोड बारे येँ महानगरपालिका पूर्वाधार शाखा प्रमुख रामबहादुर थापां धाःसा बिष्णुमति लिंकरोडया प्रोजेक्ट मेगु हे संस्थां चले यानाच्वंगु खँ कनादिल । वय्कलं धयादिल, ‘थुकी महानगरपालिकां छुं हे याये फइगु अवस्था मदु । थ्व प्रोजेक्ट महानगरपालिका दुने मलाः ।’

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन