निगू कोरियाया वार्तां न्हूगु लँपु चायेकूगु दु

कोरियाली सञ्चार माध्यमतय्सं निगू कोरिया दथुइ शुक्रवाः जूगु शिखर वार्तायात ऐतिहासिक धासें थुकी न्हूगु युग न्ह्याकेत लँपु चायेकूगु खँ धाःगु दु ।उत्तर कोरियाली नेता किम जङ अन व दक्षिण कोरियाली राष्ट्रपति मुन जे इन दथुइ कोरियाली प्रायद्वीपयात पारमाणिविक अस्त्रपाखें मुक्त यायेगथु निंतिं नापं ज्या यायेगु सहमति जूगु खः ।उत्तर कोरियाया सरकारी समाचार संस्था केसीएनएं शिखर वार्ताया प्रसंशा यासें समृद्धि चूलाकेगु दिशाय् न्हूगु ईल्वहं जूगु खँ धाःगु दु ।

चीन व अमेरिकां नं निगू कोरियाया सहमतियात लसकुस याःगु दु । अथेखःसां अमेरिकी राष्ट्रपति डोनल्ड ट्रम्पं उत्तर कोरियायत अझं दबाब बियाच्वनेमानीगु खँ धाःगु दु । ट्रम्पं नं उत्तर कोरियाली नेता किम जङ अनयात वइगु जुनय् नापलायेत्यंगु दु ।
राष्ट्रपति ट्रम्पं धाःगु दु, ‘झीसं थ्वपालय् थःत ध्वंलाके बीमखु । आशा दु, छुं सम्झौता जुइ ।’

शिखर बैठकय् निगू कोरियाली नेतातय्सं सन् १९५३ या युद्धविरामं दिनाच्वंगु कोरियाली युद्धयात औपचारिक रुपं हे क्वचायेकेगु निंतिं नापं ज्या यायेगु सहमति नं याःगु खः ।निगू कोरियाली देय्तय्सं न्हापा नं थज्याःगु हे सहमति यानाः प्रतिबद्धता प्वंका वयाच्वंगु खःसां उत्तर कोरियां पारमाणविक व क्षेप्यास्त्र परिक्षण यानाः थुकिया उल्लंघन याना वयाच्वंगु खः ।