ने. सं. ११४४ चौलाथ्व द्वादशी -

हाकनं सलाह

विश्व फुटबलय् थौकन्हय् सुं छम्ह कासामिया चर्चा दुसा व खः, इजिप्टया मोहम्मद सलाह । अथेला वया लिसा कयाः जुयाच्वंगु चर्चा धाःसा इजिप्टया नितिं म्हिता मखसें इंग्लिस प्रिमियर लिग क्लब लिभरपुलया नितिं खः । नकतिनी युरोपेली च्याम्पियन्स लिग सेमिफाइनलया क्वचाःगु न्हापांगु लेगय् लिभरपुलं एएस रोमायात ५–२ गोलं बुकल । उगु कासाय् सलाहं निगू गोल ला यात हे, मेगु निगू गोलया नितिं अवसर नं सिर्जना याःगु खः ।

आः लिभरपुल थ्यमथ्यं फाइनल थ्यन धाःसां ज्यु । अथेला रोमय् निगूगु लेगया कासा जुइ ल्यं हे दनी । उकि रोमां ५–२ या स्कोरं ल्युने लानाच्वंगु स्थिति परिवर्तन नं यायेफु । थ्वंया न्ह्यः क्वाटरफाइनलय् रोमां बार्सिलोनाविरुद्ध थःज्याःगु हे स्थितिइ थःत अनुकुल स्थिति हःगु खः । बार्सिलोनाविरुद्ध थज्याःगु लिच्वः हयेफुसा लिभरपुलविरुद्ध जक छाय् हये मफइ धकाः ? थुकिं नं लिभरपुल आरामया स्थितिइ च्वनेफइगु मदु धाःसां ज्यु ।

तर थुकिया नितिं रोमां हाकनं छगू मेगु चमत्कार हे याये माली । आः थत्थें काःसा सकसिया म्हुतुइ खालि सलाहया हे जक चर्चा दु । संयोगं रोमा वयाःगु पुलांगु क्लब हे खः । रोमां हे थगुनेया सिजनय् व लिभरपुल वःगु खः । उब्ले यक्वसिया अनुमान खः, सायद व इंग्लिस भूमिइ सफल जुइमखु । थथे छाय् धाःसा वं थ्वयां न्हय् मेगु प्रिमियर लिग क्लब चेल्सीया नितिं नं म्हिते धुंकूगु खः । अन धाःसा व सफल मजु । उकिं थज्याःगु हे ग्याचिकु लिभरपुलय् नं जुइ धयाःगु दयाच्वंगु खः ।

तर छतिं मजु । वया नितिं लिभरपुलय् न्हापांगु सिजन तसकं गज्जब सावित जुल । वं छगू लिपा मेगु गोल याना च्वंगु दु । थुकिया हे कारणं लिभरपुल प्रिमियर लिगय् शीर्ष प्यंगुगु थासय् लाइगु थ्यमथ्यं निश्चित दु धाःसा मेगु टिम च्याम्पियन्स लिगया फाइनल थ्यनीगु सम्भावना नं उतिकं दु । रोमाविरुद्धया निगू गोल लिपा वं थ्व सिजनय् याःगु गोलया ल्याः नं ४३ थ्यने धुंकूगु दु । थुकिं हे नकतिनी व प्रिमियर लिगया ‘प्लेयर अफ द इयर’ नं घोषित जुइधुंकूगु दु ।

वं थ्व उपाधि त्याःगु प्रिमियर लिगय् म्हितिपिं कासापिं दथुइ खः । वं थुकिया नितिं म्यानचेस्टर सिटीया केभिन डे ब्रुनयात निगूगु थासय् लाकूगु खः । आः धाःसा थथे धायेगु नं सुरु जूगु दु, वयात फिफां थुगुसीया उत्कृष्ट कासामिया सिरपाः नं बिमाः, अथे धयाःगु वयात बेलन डे’अर नं लायेमाः । अले अथे धयाःगु वया प्रदर्शन थौकन्हय् रियल म्याड्रिडया क्रिस्टियाना रोनाल्डो व बार्सिलोनाया लियोनल मेसीसिबें छुं कम मजु । उकिं हे ला खः, वया चर्चा नं हाकनं हाकनं जुयाच्वंगु दु ।