युवा स्वरोजगार कोषं ५ लाख त्यासा बीगु

येँ –  युवा स्वरोजगार कोषं युवा उद्यम व्यवसाय सञ्चालन यायेगु निंतिं प्रतिव्यक्ति ५ लाख तका त्यासा बीगु तयारी यानाच्वंगु दु । थ्व स्वयां न्ह्यः प्रति व्यक्ति २ लाख तका बिया वयाच्वंगु खःसा कोषं आः ५ लाख तक त्यासा बीगु कोषया कार्यकारी उपाध्यक्ष डा. प्रेम दंगालं कनादीगु दु ।

कोषं युवातय्त उद्यम, कृषि लगायत स्वरोजगारमुखी व्यवसाय सञ्चालन यायेगु निंतिं सहुलियत दर (५ प्रतिशत ब्याजं) त्यासा बीगु यानाच्वंगु दु । न्हापा २ लाख तका छुं हे बरः मतःसें बीगु यानाच्वंगु खःसा आः ५ लाख तका त्यासा बरः कयाः बीत्यंगु खः । ‘थौं स्वयां झिदँ न्ह्यः बीगु ध्यबा आःया परिस्थितिइ व्यवसाय यायेत थाकुइ धुंकुल’, वय्कलं धयादी, ‘अथेजुयाः बेसा भाः कथं २ लाख निसें ५ लाख तका त्यासा बीगु जुइ ।’

कोषं गरिबी, लिउलाःपिं, सीमान्तकृत, कृषक मजदुर लगायतपिंत स्वरोजगार दयेकेगु निंतिं त्यासा बीत्यनागु खँ नं वय्कलं कनादीगु दु । वि.सं. २०६७ सं कोषं युवा व्यवसाय सञ्चालन यायेगु निंतिं २ लाख तका सहुलियत ब्याज दरं त्यासा बीगु निर्णय याःगु खः । अथेहे कोषं नीम्हेसिया युवा पुचःयात १ करोड तका सहुलियत दरं त्यासा बीगु जूगु दु ।

छम्हेसित ५ लाखया दरं १ करोड तका त्यासा बीगु खँ कोषया कार्यकारी उपाध्यक्ष दंगालं कनादीगु दु । कोषं सहकारी व बैंकपाखें. उद्यम व व्यवासाय न्ह्याकेगुया निंतिं त्यासा बियाच्वंगु दु ।

सम्बन्धित बुखँ

LEAVE YOUR COMMENTS