ल्वापुया हा
भगीरथया प्यम्ह काय दु । व्यापार नं छगू हे, अले च्वनीगु नं नापं थःपिनिगु छेँय् हे खः । तर थुखे छुं ला दत, इमि दथुइ ¥याङथ्याङ मदयाच्वंगु । गबलें सुं काय थः दाजुकिजापिनिगु खँ न्यंकेत अबुयाथाय् वइ, गबलें मेम्ह काय वयाः अंशबन्दा यानाबी माल धाःवइ । इमिगु न्हियान्हिथंया ल्वापु खँखं भगीरथ दिक्क चायेधुंकल ।
छन्हु ला प्यम्हं हे नापं वयाथाय् वयाः व्यापार व सम्पत्ति इनाबीमाल धकाः धाःवल । भगीरथं दिक्क चायाः इमित धाल, ‘मचाबलय् ला छिपिं थथे मल्वाः । सकलें मिलेचले जुयाः हे च्वनाच्वंगु खः । आः अज्याःगु छु जुल ?’थुबलय् लाक हे अबुम्हेसिया मिखा पिनेसं च्वनाच्वंपिं स्वम्ह प्यम्ह खिचातय्थाय् जूवन, गुपिं मिखा तिसिनाः, म्ये लुयाः स्येंस्यें वयेकाः च्वनाच्वंगु दु । ‘छिपिं स्वयां ला थ्व खिचात हे बेस । गुलि शान्त जुयाः नापं च्वनाच्वंगु दु ।
छिपिं ला खिचात स्वयां नं मभिंपिं लात का,’ भगीरथं इमित तं पिकयाः न्यंकल ।थ्व खनाः दक्वं दाजु–किजापिनि मछालाः छ्यं क्वछुत । थुबलय् लाक्क हे छगू तल्ला च्वय् बालं च्वनाच्वंम्हेस्यां मरि छपाः वांछ्वयाहल, गुगु खिचातय् न्ह्यःने लाक कुतुंवल । सकसिनं मिखा कन । छम्ह खिचा मरिपाखे न्ह्याःवन । वयात खनाः मेम्ह खिचां नं उयाहल । मरि वांन्याःम्ह खिचां अनं याकनं बिसिउँ वनेत स्वल ।
तर ल्यंदुपिं मेपिं खिचात सकसिनं ह्वाउँ ह्वाउँ उयाः वयाके च्वंगु मरि लाका कायेत सन । थथे लाकालुकु याःबलय् गुलिसितं मरिकुचा छकू दतसा गुलिसितं छकू नं मदु । तर दक्वसिनं दक्वसिनं हे न्यानाच्वंगु दु । मरि ला गबलय् फुइ धुंकल का, तर खिचातय्सं धाःसा अझ नं छम्हं मेम्हेसित उया हे च्वन तिनि । क्वथाय् च्वनाच्वंपिं सकसिनं ल्वापुया कारण बांलाक हे थुयावल ।
LEAVE YOUR COMMENTS