मांभासं ब्वंकेत ३५ गू भाय् सयेकूम्ह शिक्षिका

छम्ह शिक्षकयात गुलि तकया सिरपाः लायेफु जुइ । छगू लाख, निगू लाख, झिगू लाख… । तर लन्दनया छम्ह शिक्षिकायात झिगू करोडया सिरपाः बिउगु दु । अले थ्व सिरपाः वं मस्तय्त ब्वंकेगु निंतिं थःम्हं याःगु कुतःया कारणं खः । लन्दनया ब्रेन्टय् च्वंगु एल्पर्टन कम्युनिटी स्कुलया शिक्षिका ३९ दँया एन्ड्रिया जाफिराकों मस्तय्त थुइक आखः ब्वंकेगु खःसा उमिगु मांभासं हे आखः ब्वंके माः धकाः थःम्हं हे जक ३५ गू भाय् स्यनाकाःगु खः ।

मांभासं आखः ब्वंकेबलय् मस्तय्सं याउँक सयेके सिइके फइ धयागु थूम्ह शिक्षिका एन्ड्रियां याःगु अतुलनीय कुतःया कारणं हे वयात भार्की फाउन्डेसनं १० लाख डलर (झिगू करोडं मल्याक) सिरपाः बिउगु खः । विश्वन्यंकंया ३० हजारम्ह शिक्षक शिक्षिकातय्सं थ्व सिरपाः कायेगु निंतिं आवेदन बिउगु खः, गुकी मांभासं शिक्षा बिइगु निंतिं अठक कुतः याःम्ह एन्ड्रियां थ्व सिरपाः ल्हातय् लाकूगु खः ।

एन्ड्रियायात पुलांम्ह अमेरिकी उपराष्ट्रपति अल गोर, पुलांम्ह बेलायती प्रधानमन्त्री टोनी ब्लेयर व फर्मुला वन ड्राइभर लेविस ह्यामिल्टनया उपपस्थितिं थ्व सिरपाः लःल्हाःगु खः । सिरपाः लःल्हाःगु समारोहय् बेलायतया प्रधानमन्त्री थेरेसा में जाफिराकोयात भिंतुना सन्देश नं बिउगु खः ।सु खः एन्ड्रिया ?एन्ड्रियां आखः ब्वंकीगु स्कुल दुगु बे्रन्ट शहर मिश्रित जातजातिया बसोबास दुगु थाय् खः । थनया स्कुलय् जक सछि व स्वीगू भाय् ब्वंकी, अले थन अप्वः थें बेलायतया गरीब परिवारया मस्त ब्वनेगु याइ ।

एन्ड्रियाया योगदानया निंतिं भार्डि फाउन्डेसनपाखें झिगू लाख डलर (झिगू करोड) तकाया सिरपाः

थुपिं हे मस्तय्त उमिसं थूगु भासं ब्वंकेमाः धकाः हे एन्ड्रिया थःम्हं ३५ गू भाय्या आधारभूत तालिम काल । उकिया लिसें वं थःगु स्कुलया मस्तय् मांअबुपिं लिसे नं बांलाःगु स्वापू तल । वयागु कडा परिश्रमया हे कारणं एल्पर्टन कम्युनिटी स्कुल ब्रेन्टया बांलाःगु स्कूल मध्ये छगू जुइधुंकूगु दु । आर्ट व टेक्स्टाइल विषय ब्वंकीम्ह एन्ड्रियां दकलय् न्हापां अनया शिक्षकतलिसे जानाः पाठ्यक्रमय् हिउपाः हल । वं धाःगु दु ‘जिं ब्वंकेगु विषय तसकं महतवपूर्ण जू, थुकिं विद्यार्थीतय् भाषिक पंगः चिइकेत ग्वाहालि याइ ।’

उत्तरी लन्दन ब्रेन्ट शहर छगूकथं आपराधिक लागा खः । थन मनूतय्सं स्कुलं लिहां वयेबलय् तकं हिंसा व अपराधया सामना याये मालेफु । अज्याःगु थासय् आखः ब्वंगु तसकं चुनौतिया ज्या खः । थनया मनूतय् आर्थिक अवस्था कमजोर जूगुलिं मस्तय्त होमवर्क यायेत तकं बांलाःगु थाय् व ई दइमखु । अज्याःगु थासय् एन्ड्रियां कडा परिश्रम यात । वं स्कुल सिधयेधुंकाः व बिदाया इलय् नं मस्तय्त ब्वंकेगु, होमवर्क यायेत ग्वाहालि यायेगु यानाच्वन ।

मस्तय्त स्कुलं लिहां वनेबलय् आपराधिक घटनाया सामना यायेम्वालेमा धकाः प्रहरीया ग्वाहालि काल । मस्तय्त ब्वंकेगु निंतिं वं छु यायेफु, उलि यात । वयागु थ्व हे परिश्रम व मेहनतं वयात जक सफल याःगु मखुकि वं ब्वंकीगु स्कुल नं आः बेलायतया बांलाःगु न्यागू प्रतिशत स्कुल दुने लाःवनेधुंकूगु दु ।

 

सम्बन्धित बुखँ

LEAVE YOUR COMMENTS