ने. सं. ११४३ ञलाथ्व चतुर्दशी -

जनतां निर्णय यायेमाःगु दु ! अविलम्ब

छगू अन्तर्वार्ता । टि.भी. । भूतपूर्व प्रधानमन्त्रीलिसे काःगु । प्रश्नकर्तां न्यनी, ‘छिगु प्रधानमन्त्रीकालय् देशय् न्ह्यथनेबहगु विकास छु छु जुल ? कृपया सीके फइला ?’ प्रधानमन्त्रीजुं छु छु धाइ, बमन याइ । न्हाय्पं तिंस्वाकाः उत्सुक जुयाः न्यनेत स्वया । भूपू प्रधानमन्त्रीजुं तसकं गर्व यानाः लिसः बी ….. ‘धरहरा, रानीपुखु, दरवार स्कुल ….. । लिसः न्यने । न्यना च्वनाम्ह जितः म्हछम्हं फ्वतः फ्वतः वःथें जुइ । म्ह चें चें धाइ । म्हछम्हं चासुइ । भूपू प्रधानमन्त्रीजुया लिसलं जितः ला आल जिं जू थें च्वं । जितः ला च्वनां च्वने मजिल । छुं न छुं तःधंगु विकास कार्यया फेहरिस्त न्ह्यःने तइला ।

देशय् थःगु शासनकालय् याःगु अनेक संवृद्धिया हिसाब किताब न्ह्यब्वइ ला ! वां खानाः आशा याये । तर लिसलय् भूपू प्रधानमन्त्रीं ‘धरहरा, रानीपुखु पुनःनिर्माणयात हे थःगु कार्यकालया चमत्कारपूर्ण विकासया रुपय् प्रस्तुत यात । खः, तःभुखाचं क्षति जूगु धरहरा, रानीपुखूया पुनःनिर्माण जूगु खः । उकी शंका मदु । तर थःगु कार्यकालया उल्लेखनीय विकासया उपलब्धिकथं थुकियात भूपू प्रधानमन्त्रीं दावा याये ल्वःला ?

थ्व हास्यास्पद, गाइजात्रे लिसः मखुला ? अन्तर्वार्तायात न्हाय्पं बियाः एकचित्त यानाः न्यने । भूपू प्रधानमन्त्रीजुं लिसः छु सुरय् बिउगु जुइ ? छम्ह प्रधानमन्त्रीया पद ग्रहण याइम्ह व्यक्तिं देय्या विकास छुकियात धायेगु ? विकासया अर्थ छु खः ? छु जुइ ? छु जुइमाः ? कमसेकम मूलभूत अवधारणाय् स्पष्ट जुइमाःगु खः । राष्ट्रिय विकास धायेबलय् छु छु कार्यक्रम सम्पन्न यायेमाः । याये माली ? देशय् जनताया गज्याःगु उन्नति प्रत्याभूत जुइमाः ? जनताया आर्थिकस्तर गुकथं थहां वयेमाः । विकासया अनेक आयाम दइ । विकासया अनेक ख्यः दइ । तर आश्चर्य ! भूपू प्रधानमन्त्रीं थःगु कार्यकालया विकासया मापदण्डकथं धरहरा व रानीपुखूयात न्ह्यथनी । न्यने, ख्वये ला ? न्हिले ला जुइ । तर नुगः भचा याउँसे च्वनी जब जिं सीके व अन्तर्वार्ता गाइजात्रा पर्वया अन्तर्वार्ता खनी ।

अन्तर्वार्ता बिउम्ह नं सक्कलिभूपू प्रधानमन्त्री मखया च्वन । भूपू प्रधानमन्त्रीया नामय् हःम्ह गाइजात्रे प्रतिनिधि पात्र जुयाच्वन । मनय् सन्तोष नं लुल । हास्यव्यंग्यं जाःगु अन्तरर्वार्ता यथार्थय् गाइजात्रा पर्वय् जूगु खःसां थौंया सदाबहार गाइजात्रे यथार्थया मार्मिक चिन्तन उकिं दुरुस्त च्वंगु किया बिउगु जुयाच्वन ।

थौं छम्ह पासां फोनय् धया हइ ‘जितः थ्व नेतातय् ख्वाः हे स्वये मास्ति मवयेधुंकल । सः हे न्यने मययेधुंकल । डाक्टरतय्सं धाइ तनावय् च्वने मजिउ । मनयात शान्तस्थितिइ तयेमाः । गथे यानाः मन शान्त याये फइ ! रेडियो न्यंसां व हे नेतातय् ल्वापु । टि.भी स्वःसां नेतातय् ल्वापु । देश विकास, जनताया उन्नति बारे छुं हे न्यने दुगु मखु ….. खालि मन स्यंकीगु खँत जक न्यने …..’ पासां हीमी चायाः फोनं धया हःगु खँ, थौं अधिकतम जनमानसया मनोवैज्ञानिक स्थितियात प्रतिविम्बित याना क्यनी । राजनीतिक स्वार्थं भः भः न्हुया जुइपिं छम्हु मनूत व थौंया देय्या कटु राजनीतिक परिस्थितिं अधिकांश देशवासीतय्त तनावग्रस्त यानाच्वंगु दु । देश जनताप्रति भिं जुइगु छुं ज्या जुइ धइगु भ्याः भचा हे आशावादी जुइगु परिस्थिति देशय् मदु ।

थौं नेतातय् दथुइ थःथःगु स्वार्थया लागि निकृष्ट वाकयुद्ध जुयाच्वनी । विभिन्न दल नेतात दथुइ देय् जनताया विकास, उन्नतिया लागि सकारात्मक प्रतिस्पर्धा जुइमाःगु खः । तर अःखः नितान्त व्यक्तिगत पद, शक्तिया लागि ल्वानाः देय् जनतायात हे छखे तयाः इपिं थःथःगु अहंकारया तृप्तिया लागि अनेक जालझेल, षडयन्त्रय् रमे जुयाच्वनी । पिनें जनता, देशया स्वार्थया लागि धकाः दावा याइ । तर नेतातय् ल्वापुइ थःगु निजी स्वार्थ बाहेक छुं दइमखु । थौं देशय् विभिन्न दलत कुचा कुचा दला वंगु दु । दलया स्वार्थ स्वयां नेतातय् अहं, स्वार्थया हावी जूगु कारणं अ·भ· जुइ । दलत पिनें ततःधंगु नारा क्यनाः यथार्थय् जालझेल यानां जिल ला, हुले यानां जिल शक्तिइ आरोहण यायेगु कासाय् दुनाच्वनी ।

थौंया राजनीतिक परिस्थितिं संकेट याइ, देय्या राजनीतिक परिस्थिति थथे हे अराजक नेतातय् जालझेलया शिकार जुयाच्वनीगु खःसा, देशं सलंसः दँतक थुकिया दुष्परिणाम भोगे याये माली । भविष्यवाणी याये फइ ! आः देश जनतां विचाः यायेमाःगु ई वःगु दु । देशय् जनता देय्या लागि वैकल्पिक राजनीतिक नेतातय् खोजी यायेमाःगु दु । आम जनता गम्भिर जुइमाःगु दु । खोजी गुकथं सम्भव जुइ – शान्तिमार्गं वा जनतां निर्णय यायोमाःगु दु । अविलम्ब !