प्रहरी दमनया विषयय् नयाँ शक्ति पार्टी विवाद

येँ – स्वनिगःया स्थानीय जनतां म्हीग याःगु प्रदर्शनय् प्रहरीपाखें जूगु बर्बर दमनया विरोधय् वक्तव्य पिकायेगु लाकि पिमकायेगु धइगु खँय् नयाँ शक्ति पार्टीइ विवाद पिहां वःगु दु । उकथं हे युरोपियन युनियनया चुनावी पर्यवेक्षण समितिं पिकाःगु रिपोर्टया समर्थन यायेगु कि विरोध यायेगु धइगु खँय् नं तीव्र विवाद पिहां वःगु खँ सीदुगु दु । म्हिगःच्वंगु पार्टीया येँ जिल्ला कमिटीया बैठकय् न्ववाःपिं नेवाः कार्यकर्तातय्सं प्रहरी दमनया विरोध यायेमाः धकाः न्ववाःगु खःसां मेगु जातिया कार्यकर्तातय्सं विरोध याये म्वाःगु खँ धाःगु खः । थुकिं यानाः बैठकय् ताःहाकः विवाद जूगु खः । पार्टीया अध्यक्ष डा. बाबुराम भट्टराई नं उपस्थित जुयादीगु उगु बैठकय् कार्यकर्तातय्सं ईयुया रिपोर्टयात कयाः डा. बाबुराम भट्टराईनं बियादीगु न्हापांगु प्रतिक्रियाया नं तच्वकं विरोध जूगु खःसा पार्टीपाखें उगु रिपोर्टयात समर्थन यासें वक्तव्य पिकायेमाः धकाः नं सः थ्वःगु खः ।