नाकाबन्दीविरुद्ध कांग्रेस न्ववायेमफुगु तसकं दुर्भाग्य – प्रकाशमान सिंह

येँ –शुक्रवाः निसें न्ह्याःगु नेपाली कांग्रेसया केन्द्रीय कार्यसमितिया बैठकय् पुलांपिं महामन्त्रीत प्रकाशमान सिंह व कृष्ण सिटौलां सभापति शेरबहादुर देउवायात धायेजिक्व धाःगु दु ।

प्रतिनिधि सभा व प्रदेश सभाया क्वचाःगु चुनावया समीक्षा यायेत जूगु बैठकय् सुरुइ हे न्ववासें भाजु सिंहं सभापति देउवाया हे कारणं कांग्रेसं बांमलाक पराजय फयेमाःगु खँ तप्यंक हे धयादीगु खः । च्यागू पेजया सुझाव हे न्ह्यब्वसें भाजुं सिहं कांग्रेसया इतिहासय् हे थुकथं लज्जास्पद ढंगं पराजय फयेमाःगु मदुनि धासें थुकिया जिम्मेवार देउवा हे जूगु खँ धयादीगु खः ।

देउवाया सत्ता केन्द्रीत राजनीति, भारतं तःगु आर्थिक नाकाबन्दीविरुद्ध न्ववाये मफुगु, तत्कालिन प्रधानन्यायाधीशविरुद्ध महाभियोगया प्रस्ताव तःगु, सत्ताया निंतिं माओवादी अध्यक्ष पुष्पकमल दाहाललिसे पाःपाः प्रधानमन्त्री जुइगु सम्झौता याःगु, स्थानीय चुनावय् दाहालया म्ह्याय्यात त्याकेत भूमिका म्हितूगु खः, प्रहरीइ छम्ह डिआजीयात बढुवा यानाः आइजीपी दयेकेत देउवां म्हितूगु भूमिकां यानाः हे पार्टी पराजय फयेमाःगु खँ भाजु सिंह धयादीगु खः ।

वय्कलं भारतं तःगु नाकाबन्दीविरुद्ध कांग्रेस न्ववायेमफुगु तसकं दुर्भाग्य जूगु खँ धयादीगु खः ।

वय्कलं निदँ दयेधुंकाः नं उपसभापति व महामन्त्रीलिसे केन्द्रीय कार्यसमिति गठन यायेमफुगु, पार्टी विभाग पूर्णता बीमफुगु कारणं नं कांग्रेसं पराजय फयेमाःगु खँ धयादीगु खः ।

सभापति देउवां प्रधानमन्त्री जूगु इलय ६४ म्ह मन्त्री दयेकाः लोकयात न्हिइकूगु धासें देउवाया थज्याः–थज्याःगु सत्तालोलुप ज्यां पार्टी लज्जास्पद ढंगं पराजित जूगु खँ नं नेता सिंहं धयादीगु खः ।

पार्टी केन्द्रीय कार्यालय सानेपाय् जूगु बैठकय् न्ववासें पुलांम्ह महामन्त्री कृष्ण सिटौलां नं पार्टी नेतृत्वया गम्भीर गल्तीं यानाः हे पराजय फयेमाःगु खँ धयादीगु खः ।

संविधान घोषणा धुंकाः निसें सत्ता समीकरणय् नेतृत्वं गल्ती याःगु धयादिसें वय्कलं स्थानीय चुनावया इलय् माओवादी अध्यक्षयात लय्तायेकेत थः उम्मेदवारया उम्मेदवारी केन्द्रपाखें हे रद्द यानाबिउगुलिं कांग्रेस प्रति जनताय् मनोवैज्ञानिक रुपं नकारात्मक लिच्वः लाःगु खँ नं वय्कलं धयादीगु खः ।

शुक्रवाःया बैठकय् नेता सिंह, सिटौला व डा. नारायण खड्कां जक न्ववानादीगु खः । बैठक थौं नं ११ बजे निसें न्ह्याइ ।

सम्बन्धित बुखँ

LEAVE YOUR COMMENTS