येँ मनपा व रामग्राम दथुइ भगिनी सम्बन्ध
येँ (नेपालभाषा टाइम्स) – बुद्ध दर्शनया दृष्टिं महत्वपूर्ण निगू नगरया दथुइ भगिनी सम्बन्ध स्थापना जूगु दु । बुद्ध दर्शनया दृष्टि महत्वपूर्ण येँ महानगरपालिका व रामग्राम नगरपालिका दथुइ भगिनी सम्बन्ध स्थापना जूगु खः ।
भगिनी सम्बन्ध स्थापना सम्बन्धी सम्झौतापती येँ महानगरपालिकाया प्रमुख विद्यासुन्दर शाक्य व रामग्राम नगरपालिकाया प्रमुख नरेन्द्रकुमार गुप्तां ल्हाःचिं तयादीगु खः । संघीया राजधानीलिसें ऐतिहासिक, धार्मिक, पुरातात्विक महत्वया येँ महानगर व भगवान गौतम बुद्धया पवित्र अस्थिधातु दुगु प्राचीन रामग्राम नगर दथुइ वंगु शनिवाः निगू नगरया प्रमुखं ल्हाःचिं तयाः भगिनी सम्बन्ध स्थापना जूगु घोषणा यानादीगु खः ।
सहमति पती ल्हाःचिं तसें निगुलिं नगरया प्रमुखं भगिनी सम्बन्धी स्थापना यानाः मैत्रीपूर्ण व दिगो संस्थागत सम्बन्ध स्थापना यायेगु, संस्थागत प्रणालीयात अझ सुदृढ व सबल यायेगुलिसें थीथी विषयय् थवंथवय् समन्वय, सहकार्य व साझेदारीपाखें अनुभव कालबिल यायेगु उद्देश्यं भगिनी सम्बन्धी स्थापना जूगु खः ।
निगू नगर दथुइ भगिनी सम्बन्ध स्थापना यायेगु ल्याखं जूगु ज्याझ्वलय् नगर-नगर साझेदारी ज्याझ्वः अन्तर्गत येँ महानगरपालिकां रामग्राम नगरपालिकायात धार्मिक व पर्यटकीय स्थलया रुपय् विकास यायेगु नापं ‘कोलिय शान्ति उद्यान’ निर्माणया निंतिं छगू करोड न्यय्गू लख बीगु नं घोषणा याःगु दु। सम्झौताकथं निर्माण जुइगु ऐतिहासिक व पर्यटकीय उद्यान दुहां वनेगु मूलुखालिसें मेमेगु उपयुक्त थासय् ‘येँ महानगरपालिका व रामग्राम नगरपालिकाया साझेदारी ज्याझ्वः अन्तर्गत निर्माण जूगु उद्यान’ धकाः न्ह्यथने माःगु जुइ ।
ल्हाःचिं तयेगु ज्याझ्वलय् नवासें येँ मनपा प्रमुख शाक्यं बौद्ध दर्शनया दृष्टिकोणं येँ व रामग्राम दथुइ क्वातूगु सांस्कृतिक सम्बन्ध दुगु खँ न्ह्यथनादिसें येँय् नं उत्तर व दक्षिण कोलियग्राम दुगु व थनया कोलियग्रामया दथुइ विगतय् छुं सम्बन्ध दयेमाः धयादिल ।
उगु सम्बन्धया बारे अध्ययन यायेगु चरणय् थःपिं दुगु खँ कनादिसें वय्कलं निगू नगर दथुइ आः जक मखु दँ दँ न्ह्यवंनिसें हे सम्बन्ध दयेमाः धयादिल । ‘मूर्त व अमूर्त संस्कृति, सम्पदा वपर्यटकीया क्षेत्रया संरक्षण, संवद्र्धन, विकास व प्रचार प्रसारया ज्याय् सहकार्य यायेगु जुइ’ प्रमुख शाक्यं धयादिल, ‘प्रकृति व पर्यावरणया समुचित सन्तुलन मजुल धाःसा मानव समाजया अस्तित्व हे खतराय् लाये फु धइगु खँयात वाः चायेकाः थवंथवय् सहकार्य, ठोस योजना व नतिजामुखी क्रियाकलाप संचालन यायेगु जुइ ।’
रामग्राम नगरया प्रमुख गुप्तां येँ मनपालिसे भगिनी सम्बन्ध स्थापना यायेगु खँगुलिं लसता प्वंकादिसें सम्भावना व चुनौति मिले जुइगुलिं विदेशी सहरलिसे स्वयां थःगु हे देय् या सहरलिसे स्थापना जुइगु भगिनी सम्बन्ध लाभदायक जुइ धयादिल । उगु इलय् येँ मनपाया उपप्रमुख हरिप्रभा खड्गी श्रेष्ठ, रामग्राम नपाया उपप्रमुख रम्भा कुँवरं नं न्वानादीगु खःसा येँ मनपाया प्रमुख प्रशासकीय अधिकृत राजेश्वर ज्ञवालीलिसें वडाअध्यक्ष व कार्यपालिकाया दुजःपिनिगु उपस्थिति दुगु खः।
LEAVE YOUR COMMENTS