ने. सं. ११४४ ञलागा पारू -

शंखधर उद्यानया नामय् राप्रपाया राजनीति

येँ महानगरपालिकां साविकया रत्नपार्कय् नेपाल संवत्या प्रवर्तक राष्ट्रिय विभूति शंखधर साख्वाःया झ्वाता तयाः उकिया लिउने शंखधर उद्यान धकाः साइनबोर्ड थना बिउबलय् राप्रपाया मनूत थुगु नामाकरणया विरुद्ध कुहां वःगु दु । दकलय् न्हापां ला राप्रपाया स्वम्हमध्ये छम्ह नायः कमल थापां ट्विटरय् थ्व खँ थःपिंत स्वीकार्य मजूगु व माल धाःसा थःपिंसं हस्तक्षेप तकं यायेगु खँ धाल । वयांलिउ राप्रपाया स्वम्ह नायःत पशुपति शम्शेर राणा, प्रकाशचन्द्र लोहनी व कमल थापाया वक्तव्य पिहां वल । थुगु वक्तव्यय् इतिहास हुइगु ज्या पाय्छि मजूगु व शंखधर थुज्वःम्ह विभूतिया नामय् मेथाय् हे तःधंगु स्मारक दयेकेमाः धाल । थ्वयांलिउ राप्रपा येँ जिल्ला समितिया नायः नवराज सिम्खडाया नेतृत्वय् येँ महानगरपालिकाय् प्रतिनिधिमण्डल वयाः इतिहास हुइ मजिउगुलिं उगु पार्कया नां रत्नपार्क हे कायम जुइमाःगु व शंखधरया नामय् मेथाय् हे पार्क दयेकेमाःगु माग यात ।

थ्वयांलिउ नेपाली कांग्रेसया सांसद भीमसेनदास प्रधानं नं येँ महानगरपालिकां दंगु राजनीति याःगु द्वपं बियाः न्ववाःगु खँ पिहां वल । भीमसेनदास प्रधानया थुगु अभिव्यक्ति ला वय्कलं येँ महानगरपालिकाया नेतृत्वलिसे फरक मत तयाः न्ह्याकावयाच्वंगु राजनीतिया हे अंश जक खः । तर थन मूलभूत सवाल ला राप्रपाया नायःतसें ल्ह्वंगु खँ हे खः । थुकिया लिउने छथ्वः मनूतय्गु सेन्टिमेन्ट नं सुलाच्वंगु दु । थ्व खँ नं थुइकेत थाकु मजू । हालय् नेपाल सरकारं नेपाःया औपचारिक नां संघीय लोकतान्त्रिक गणतन्त्र मखसें नेपाल जक धकाः छ्यलाबुलाय् हयेगु धकाः गुगु निर्णय यात अले कमल थापां थुकियात गुगु लसकुस यात । थ्व थुगु इलय् बिचाः यायेबहगु खँ खः । दकलय् अजू चायापुगु खँ ला छु धायेबलय् नेपालय् वास्तविक गणतन्त्रवादी धकाः धाःपिं माओवादीत हे संघीय लोकतान्त्रिक गणतन्त्र चीकूगुखँय् तिरिक्क छसः हे न्ववाःगु मदु ।

माओवादीतसें हे छ्यलीगु छगू खँग्वः खः – जनयुद्धया रापताप । नेपालय् संविधानसभाया चुनाव जुइ न्ह्यः, अझ माओवादीयात संसदय् दुकाये स्वयां नं न्ह्यः २०६३ जेठं प्रतिनिधिसभाया घोषणा-२०६३ जारी यानाः जुजु दयेक दयेक जुजु मखसें प्रधानमन्त्रीयात हे राष्ट्रप्रमुख वा हेड अफ स्टेट धकाः घोषणा यानाबिउबलय् सुनां हे तिरिक्क छसः पिमकाः । अथे हे श्री ५ या सरकारयात नेपाल सरकार दयेकलं नं सुनां हे तिरिक्क छसः न्वमवाः । शाही नेपाली सेनायात नेपाली सेना दयेकलं सुनां नं तिरिक्क छसः न्वमवाः । आः जुजुप्रति वफादार जुइगु मखु, आः प्रतिनिधिसभाप्रति वफादार जुइमाः, जुजुया सिन्दुर तयेगु मखु, प्रतिनिधिसभाया सिन्दुर तयेमाः, मखुसा राजीनामा बियाः छेँ च्वनाः पेन्सन नयाच्वंसां जिउ धकाः धाल । अबलय् सेना, प्रहरी, निजामतिया हाकिमत फुक्क प्रतिनिधिसभाय् वनाः सपथ काः वन । सुं छम्ह नं, ‘जि ला जुजुया सिन्दुर तया च्वनाम्ह, थ्व प्रतिनिधिसभाया सिन्दुर तयाः वफादार जुइमखु, बरु छेँय् च्वनाः पेन्सन नये, व्यापार व्यवसाय यानाः नये’ धकाः धाःम्ह मनू पिहां वःगु मखु ।

मूलभूत सवाल ला राप्रपाया नायःतसें ल्ह्वंगु खँ हे खः । थुकिया लिउने छथ्वः मनूतय्गु सेन्टिमेन्ट नं सुलाच्वंगु दु। थ्व खँ नं थुइकेत थाकु मजू । हालय् नेपाल सरकारं नेपाःया औपचारिक नां संघीय लोकतान्त्रिक गणतन्त्र मखसें नेपाल जक धकाः छ्यलाबुलाय् हयेगु गुगु निर्णय यात अले कमल थापां थुकियात गुगु लसकुस यात । थ्व थुगु इलय् बिचाः यायेबहगु खँ खः ।

लिपा शाही नेपाल वायु सेवा निगम नं नेपाल वायुसेवा निगम जुल, जुजु महेन्द्रं थःगु हे ध्यबा फुकाः दयेकूगु धाःगु नेपाल राजकीय प्रज्ञा प्रतिष्ठान नं नेपाल प्रज्ञा प्रतिष्ठान जुल । वीरेन्द्र नगर नं सुर्खेत जुल, महेन्द्रनगर नं भीमदत्त नगरपालिका जुल । थासंथासय् जुजुपिनिगु झ्वाता स्यंकल । थुकी रत्नपार्कया रत्नराज्यलक्ष्मी देवी शाहया सालिक नं गन वं गन वं जुइक तन । कालिमातिइ ला २०४६ या आन्दोलनया इलय् हे महेन्द्रया सालिक तोडफोड जुइधुंकूगु खः । जुजुया दरवार नारायणहिति दुने नं म्युजियम जक दयेकूगु मखु, गणतन्त्र स्मारक धकाः अन हे दयेकल । थुज्वःगु खँय् नं खास विरोध जूगु गनं मताः । विरोध यायेवं मनू ज्वना यंकीगु पंचायतकाल ला थ्व मखु । तर अबलय् तक जनयुद्धया रापताप दुगु जुयाच्वन । आः मंत । खनेदुगु खँ थ्व हे खः ।

थासंथासय् नां हिलाहःगु खनाः हे नेकपा एमालेया जिल्ला कमिटीं मनू मुना वनाः रत्नपार्कया नां हिलाः शंखधर पार्क धकाः पिने लुखाय् हे साइनबोर्ड तःगु सकसिनं खंगु हे खः । लिपा उगु साइनबोर्ड अन वं थन वं मदयेक तन । विशेष यानाः अबलय् जिल्ला कमिटीया सचिव जुयाच्वंम्ह रामेश्वर फुयाँलं थुकिया अगुवाइ याःगु खः । थुगु इलय् नं सुनां नं छुं छसः तःगु न्यनेमदु । थ्व खँयात विश्लेषण यायेबलय् वास्तवय् राप्रपां सः तयेफुगु कारण धइगु हे जनयुद्ध अले गणतन्त्रवादीत घीसीपिटी जुयाः रापताप मदयावंगु व राजतन्त्रया पक्षया बुलुमि बुलुहुं च्यानावःगुया हे लिच्वः जूगु खनेदु ।

संघीयता, गणतन्त्र व धर्मनिरपेक्षता पक्षधरत छखे व एकात्मकता, मछिंसा संवैधानिक छिंसा पूर्ण राजतन्त्र अले हिन्दू राज्यया पक्षधरत मेखे जुयाः थौंया नेपाःया राजनीतिक शक्ति संघर्ष न्ह्यानावयाच्वंगु दु । थुगु टग अफ वारय् च्वका ज्वनाः सालाच्वंपिनि निगू धुर्व दुसा दथुइ च्वनाच्वंपिं गुखे बल्लाः उखेया कित्ताय् वनाः लबः कायेगु ज्याय् जुइपिं नं दु। थ्व आःया नेपाःया वस्तुगत राजनीतिक वास्तविकता खः । येँ महानगरपालिकां शंखधर उद्यानया नामाकरण याःगु खँय् आपत्ति पिकायेगु ज्या ला छगू अभिव्यक्ति सम्म खः । थ्व मूल विषयवस्तु मखु ।

इतिहासयात ल्यंका तयेमाः कि हाकुगु इतिहासयात हुयाः न्हूगु इतिहासयात न्ह्यःने यंकेगु खः ? राजा महाराजया इतिहास कायम यायेगु लाकि जनताया इतिहास सिर्जना यानाः न्ह्यायेगु ? थ्व सवाल निश्चित रूपं आः प्रमुख जुयाः पिहां वःगु दु । थौं शंखधरया नां बय्बय् जूबलय् शंखधरया नामं मेगु पार्क दयेकेमाः धकाः धाःपिसं म्हिगः पंचायतकालय् भाषा, जाति व संस्कृतिप्रति गुज्वःगु बेक्वःगु दृष्टि तया वल अले मोटरसाइकल र्‍याली व मास रनिङ थुज्वःगु ज्याझ्वलय् छाय् हस्तक्षेप यात ? थ्व खँ नं ल्वःमंकेगु खँ मखु । थःगु ल्हातय् दुबलय् क्वत्यलेगु व नां हे कायेके मबीगु, अझ नां प्रचारय् वलं नं थीथी भ्रम ब्वलंकेत स्वयेगु ज्या गुगु खेमां याःगु खः ? थःगु ल्हातय् मदुबलय् नं थःगु ल्हाः द्यःने लाकेत स्वयेगु ज्या निश्चित रूपं शक्ति राजनीतिया मूल्यांकनया आधारय् हे न्ह्यब्वःगु खँ खः । थ्व खँ नं थुइकेत थाकु मजू ।