प्राणीया जन्म-मृत्यु कर्मया कारणं जुइ
जीवन छगू रंगमञ्च खः । महान दार्शनिक शेक्सपीयरया धापू खः थ्व । जीवनय् सकसिनं थः थःगु कथं जीवन हनी । थः थःगु भूमिका पूवंकी । न्हाइपु म्हाइपु, सुख दुःख अझ धाये अष्ट लोकधर्मय् तःक्यँक्यं जीवन न्ह्याकी । थनं जीवनया संघर्ष क्वचाइ । मृत्युं जीवन अन्त्य जुइ । हानं मेगु जन्म काइ । थुकिं निरन्तरता बियाच्वनी । बुद्धशिक्षा कथं नं प्राणीया जन्म वया कर्म कथं जुइ । थःम्हं यानागु कर्म कथं जन्म काइ । थःगु कर्मया भोग जीवन हनी । प्राणीया जन्म थः थःगु कर्म कथं जुइ । उकथं थःम्हं भोग नं यायेमाली धइगु खँ खुज्जुत्तराया जीवनय् नं क्यं ।
बुद्धकालया छम्ह उपासिका खुज्जुत्तरा खः । वया जन्म छम्ह धाइया कोखं जूगु खः । व देवलोकं च्यूत जुयाः मनुष्यलोकय् जन्म काःवःगु खः । व बूसानिसें लंगडी । उकिं वयात सकसियां खुज्जुत्तरा धाइगु खः । खुज्जुत्तरा लंगडी छाय् जुइमाल धइगु खँ खंगुत्तनिकाय अर्थकथा व धम्मपद अर्थकथा दुने थुकथं न्ह्यथनातःगु दु । खुज्जुत्तरा तथागत बुद्धया पालाय् जक मखु। थ्व स्वयां न्ह्यः नं तःक्वमछिं मनुष्य लोकय् जन्म जूगु खः ।
छगू इलय् खुज्जत्तराया जन्म वाराणसिइ जुल । उगु इलय् जुजुयाथाय् न्हियान्हिथं भिक्षा फ्वं वइम्ह प्रत्येक बुद्ध छम्ह दु । वसपोल लंगडा जुयाच्वन । छन्हु वसपोल भिक्षाटन बिज्याःगु खुज्जुत्तरां खन । लंगडाम्ह प्रत्येक भिक्षु खनाः व न्हिल । थः पासा पुचलय् च्वनाः वसपोलयात गिजे यात । थुगु विपाकया कारणं व लंगडी जुयाः जन्म जुल । थुकथं हे काश्यप बुद्धया पालाय् नं खुज्जत्तराया जन्म जुल । उगु इलय् व बनारसी सेठया म्ह्याय् जुल । इमि छेँय् इलय् ब्यलय् भिक्षुणी छम्ह बिज्याइगु । छन्हु व समा यानाच्वन । थुगु हे इलय् भिक्षुणी छेँय् बिज्यात । अबलय् न्ह्यःने सुं दासी मदु। वं भिक्षुणीयात धाल, ‘आर्या जिगु श्रृंगारया तिसा व बट्टा थन हया बिउ ले ।’ वया खँ न्यनाः भिक्षुणीं नं बिचाः यात, ‘यदि जिं वं धाःगु ज्या याना मबिल धाःसा व जि खनाः तम्वइ । थुकिं याना वं नर्क भोग यायेमाली । यदि जिं वया ज्या याना बिल धाःसा व जन्मं जन्म तक भ्वातिं जुयाः जन्म जइमाली । नर्क लोक स्वयां भ्वातिं जुइगु बेश ।’ थुलि बिचाः यानाः भिक्षुणी नं वया ज्या याना बिल । थुगु अकुशल कर्मया विपाकं व तक्वःमछिं हे भ्वातिं जुयाः जन्म जल । खुज्जुत्तराया मेगु छगू घटना नं न्ह्यथने ।
अतीतकालया घटना खः । छन्हु च्याम्ह प्रत्येक भिक्षुपिं वाराणसिइ बिज्यात । वसपोलपिसं अन क्वाःगु पाय्स भोजन भिक्षा कया बिज्यात। उगु भिक्षा ज्वना बिज्यात। क्वाःगु पाय्सं वसपोलपिनि ल्हातय् पुत। पात्र ज्वने थाकुल । थुगु इलय् खुज्जुत्तरां थःके दुगु च्यापू चुरा वसपोलपिंत बिल । उगु चुराया द्यःने पात्र तया बिज्यात। थुगु दानया प्रभावं व बुद्धकालय् त्रिपिटकधारी महाप्रज्ञा जुल । बुद्धकालय् खुज्जुत्तरा लंगडी जुयाः जन्म जुल । वं लानि स्यामाबतीया भ्वाति जुयाः जीवन हन । छम्ह लंगडी भ्वातिं जुयाः नं वं त्रिपिटकधारी महाप्रज्ञा पद प्राप्त यात । थ्व सकतां वं याःगु न्हापाया जन्मया कुशल व अकुशल कर्मया भोग खः । थुकिं यानाः बुद्धकालय् खुज्जुत्तरा जुया जन्म जुल । थःम्हं यानागु कर्म कथं जीवन हन । जन्म व मृत्यु थःम्हं धयाथें मदु। थ्व थःम्हं यानागु कर्मया आधारं जुइगु खः । म्वायेगु जीवन ल्यं दनिम्हेसित न्ह्याक्वः हे कुतः यासां स्याये फइमखु धइगु खँ घोषित सेठया जीवनीं क्यं ।
कोशाम्विक सेठं घोषित सेठयात मचाबलय् स्यायेगु कुतः यात । वं छक्वः जक मखु तःक्वःमछिं स्यायेगु योजना दयेकल । तर वया ग्वसाः सुथां मलात । थुगु इलय् घोषित सेठ बल्लाःगु खः । घोषित सेठ न्हापाया जन्मय् खिचाया कुलय् जन्म जुल । खिचा जुयाः नं वं प्रत्येक बुद्धया बिचाः यात । वसपोल प्रति अतिकं स्नेह प्वंकल । थुगु कर्मया प्रभावं अनं लिपा व देवलोकय् जन्म जुल । देवलोकं च्यूत जुइवं हानं मनुष्यलोकय् जन्म जुल । मनुष्य लोकय् उच्च कुलय् जन्म जूगु मखु। छम्ह गणिकाया कोखं जन्म जूम्ह खः । गणिकां वयात फोहरया दथुइ वना थकल । तर वया कर्मभोग बल्लाः ।
कर्म विभाजन कथं कर्म भोग यायेमाली । गुगुं कर्म भोग थुगु हे जन्मय् यायेमाली । गुगुं कर्मया भोग मेगु जन्मय् यायेमाली । अले गुगुं कर्मया भोग जन्म जन्म तकं भोग यायेमाली । गुगुं छुं ई तक भोग यायेवं क्वचाइ । गुगुं किचः थें लित्तुलिना वयाच्वनी । प्राणीया जन्म व मृत्यु कर्मया कारणं जुइ । थःगु कर्म कथं भोग याइ । कर्म कथं सिना वनी ।
उकिं व नगरया सेठ जुयाः जीवन हन । आनन्द स्थविर पदमोत्तर बुद्धया इलंनिसें पारमिता पूवंका बिज्याःम्ह खः । बुद्धकालय् वसपोल सेवा याइम्ह उपस्थापक जुयाबिज्यात । वसपोलया जन्म तथागत जन्म जूलबय् हे जूगु खः । प्रबजित लिपा वसपोलया धर्मया भण्डार कथं नां दन । वसपोलं छक्वः न्यंगु खँ अतिकं लुमंका तयेफु। थुकथं प्रभावशाली स्थविर नं न्हापाया जन्मया कारणं तक्वःमछिं दुःख भोग यायेमाल । छगू इलय्आ नन्द स्थबिर राजगृह नगरय् जन्म जुल । लुँकःमि साहुया काय्, धन सम्पत्ति आपालं दुम्ह । उकिं वयाके धन नापं जातिया अभिमान दु। वं मेपिंत दुःख बिइगु । कतःया म्ह्याय्मस्त नापं जुइगु। इमित ब्यभिचार याइगु ।
थुकथं ब्यभिचारी जूगु कारणं मरण लिपा ग्यानापुगु नरकय् जन्म जूवन । अन तसकं दुःख सीमाल । नरकं मुक्त जुयाः नं पशुयोनीइ जन्म जुल । न्हापां खसि जुल । अनंलि माकःया कुलय् जन्म जुल । अनं लिपा दोहं जुयाः जन्म जुल । अतिकं थाकुक गाडा सालाः जीवन हने माल । कालान्तर पशु योनीइ दुःख सीमाल । अनं लिपा मनूया योनीइ जन्म जुल । थुगु इलय् नपुंशक जुया च्वनेमाल । न्ह्यागु नं इलय् थःम्हं यानागु कर्मया भोग याये मालेफु। कालान्तरय् न्ह्यः याःगु कर्मया भोग कालान्तर लिपा नं लित्तुलिना वयेफु। थुगु जुनीइ याउँक जीवन हनाच्वनी । तर न्हापाया कर्मया भोगं जीवनय् दुःख सी मालेफु । श्यामावती उदयन जुजुया अतिकं यःम्ह लानि खः । वया त्रिरत्न प्रति अतिकं श्रद्धा दु। लानि मागण्डिइ वया लिथु खः । लानि मागण्डियं वयात स्यायेत स्वत । वं तःक्वःमछिं हे स्यायेगु ग्वसा ग्वल । तर ग्वसाः ताःमलाः ।
छन्हु लानि मागण्डियं थः ककाया ग्वाहालि कयाः लानि श्यामावतीयात स्यायेगु ग्वसाः ग्वल । मागण्डिया कका लानि स्यायेत श्यामावतीया क्वथाय् वन। वं अन च्वंग थां दक्वं चिकं प्याकातःगु कापतं भुन। लानि श्यामावतीं छु यानागु धकाः न्यन। वं दरवार बल्लाकेत थथे यानागु धाल । वया खँय् लानिं विश्वास यात। वं थां दक्वं भुन । अनंलि लानि नापं सकलें पासापिंत क्वथाय् आराम यायेत छ्वयाबिल । वया खँ न्यनाः सकलें क्वथाय् वन । वं क्वथाय् पिहां वये मजिक तालं ग्वया बिल । वं थामय् च्वंगु कापतय् मि तयाबिल । चिकनं प्याःगु कापः छत्थुं च्यात । लानि नापं वया पासापिं सकलें मि च्याना सित ।
थुकथं अतिकं याउँक जीवन हनाच्वंम्ह, त्रिरत्न प्रति अति श्रद्धावानम्ह लानिं मि पुनाः सीमाल । थ्व नं लानीया न्हापाया जन्मया कर्मया भोग खः । न्हापाया जन्मय् प्रत्येक बुद्धयात स्यायेगु कुतः याःगु कारणं थुगु जन्मय् मिं पुकाः सीमाःगु खः । कर्म विभाजन कथं कर्म भोग यायेमाली । गुगुं कर्म भोग थुगु हे जन्मय् यायेमाली । गुगुं कर्मया भोग मेगु जन्मय् यायेमाली । अले गुगुं कर्मया भोग जन्म जन्म तकं भोग यायेमाली । गुगुं छुं ई तक भोग यायेवं क्वचाइ । गुगुं किचः थें लित्तुलिना वयाच्वनी । प्राणीया जन्म व मृत्यु कर्मया कारणं जुइ । थःगु कर्म कथं भोग याइ । कर्म कथं सिना वनी ।
LEAVE YOUR COMMENTS