तिंख्यलय् द्यः ल्वाकल (फोटोफिचर)

येँ – पाहाँचःह्रेया झ्वलय् शनिवाः तिंख्यलय् द्यः ल्वाकल । थौं बहनी पौन ११ बजे वटु भद्रकाली व तेबहाः भद्रकालीलिसें कंग अजिमाया द्यः ल्वाकूगु खः । द्यः ल्वाकेगु धकाः खतय् च्वनाः मिप्वाः हिलाबुला यायेगु याइ ।

द्यः ल्वाकेगु निंतिं दकलय् न्हापां तेबहाः भद्रकाली द्यः तिंख्यलय् हयातःगु खःसा थ्व लिपा वटु भद्रकाली द्यः हयाः दिकेहःगु खः । तिंख्यः दथुइ निखलं भद्रकाली द्यः थ्यनेधुंकाः कंगः अजिमाखः हःगु खः । कंग अजिमा हयेवं द्यः ल्वाकेगु ज्या न्ह्याःगु खः । कंगखः दिके मजिउगुलिं हयेवं द्यः ल्वाकूगु खः । कंग खतं नापसं दिकातःगु वटु भद्रकाली व तेबहाः भद्रकालीया खः स्वचाः चाःहिलाः दकलय् न्हापां वटु भद्रकाली द्यःखः लिसे तिंप्वाः हिलाकाःगु खः । थ्व लिपा तेबहाः भद्रकालीलिसे तिंप्वाः हिलाकाःगु खः ।

द्यःखः ल्वाकीबलय् थौंकन्हय् तिंख्यलय् न्हापां वटु भद्रकालीलिसे ल्वाकीसा असनय् ल्वाकीबलय् न्हापां तेबहाः भद्रकालीलिसे ल्वाकेगु याना वयाच्वंगु दु ।

द्यःखः ल्वाकूगु छुं किपा