होङ्सी सिमेन्टं वैशाखं निसें उत्पादन याइगु

येँ – होङ्सी सिमेन्ट वइगु वैशाख निसें सिमेन्ट उत्पादन याइगु जूगु दु । नेपाः व चिनिया व्यापारीतय् मंकाः लगानी दुगु उद्योगं न्हिं ६ हजार टन सिमेन्ट उत्पादन यायेगु तयारी यानाच्वंगु दु । वइगु चैत महिना दुने कारखानाया फुक्कं ज्या क्वचायेकेगु खँ कम्पनीं धाःगु दु । वयां लिपा परीक्षण उत्पादन लिपा वैशाखंनिसें सिमेन्ट उत्पादन यायेगु खँ धाःगु दु । होङ्सी नेपाःया सिमेन्ट उत्पादन याइगु दकलय् तःधंगु कम्पनी खः । कम्पनीं आःयात ६ हजार टन सिमेन्ट उत्पादन याइसा छुं दँया दुने १२ हजार टन उत्पादन यायेगु आज्जु कयातःगु दु । वंगु भदौ १८ गते लगानी बोर्ड व होङ्सीया दथुइ परियोजना लगानी सम्झौता जूगु खः ।

सम्झौता कथं कम्पनीं नवलपरासी सिमेन्ट कारखाना थापनाया निंतिं ३६ अर्ब ७५ करोड तका लगानी याइगु खँ धाःगु खः ।
कारखानायात माःगु कच्चा पदार्थ धाःसा पाल्पाया ज्यामिरे धइगु थासं हइगु खँ धाःगु दु । कम्पनीइ नेपाःया थीथी व्यवसायिक पुचःया ३० प्रतिशत व होङ्सीया ७० प्रतिशत लगानी दु । कम्पनीया उत्पादन बजारय् वयेवं भारतीय सिमेन्ट आयात नं म्हो जुइगु खँ धाःगु दु । लिसें कम्पनीया सिमेन्ट बजारय् वयेवं भाः नं कुहां वइगु अनुमान जुयाच्वंगु दु । अथेहे सिमेन्ट कम्पनीया दथुइ गुणस्तरीय सिमेन्ट उत्पादन यायेगु निंतिं प्रतिस्पर्धा जुयाः थुकिं उपभोक्तायात फाइदा जुइगु खँ धाःगु दु ।

सम्बन्धित बुखँ

LEAVE YOUR COMMENTS