कर्मचारी मदयाः प्रदेशतय्सं बजेट तकं दयेके मफुत
येँ – केन्द्रीय सरकारं विज्ञ कर्मचारीत छ्वया महःगुलिं प्रदेश प्रदेशय् बजेट दयेकेत व कानून दयेकेत हे समस्या वयाच्वंगु दु । प्रदेश सरकारतय्सं सम्बन्धित विषयय् विज्ञ कर्मचारीत मदुगुलिं बजेट दयेकेगु व कानून दयेकेगु थेंज्याःगु महत्वपूर्ण ज्या हे याये मफयाच्वंगु खँ धाःगु दु । केन्द्र सरकारं खटे याःपिं कर्मचारीतय् प्रदेशया दरबन्दीइ वने चाहे मजूगुलिं नं थज्याःगु समस्या वयाच्वंगु खः । आः केन्द्रीय सरकारं प्रदेशय् वने म्हाःपिं कर्मचारीतय् विकल्प मालेमाःगु अवस्था वःगु खँ धाःगु दु ।संवैधानिक व्यवस्था कथं प्रदेश सरकारतय्सं चैत महिना दुने चालु आर्थिक दँया बजेट हयेमाः । कर्मचारीया अभावं बजेट दयेकेत अन्योल जुयाच्वंगु धासें कर्णाली प्रदेशया आर्थिक मामिला तथा योजना मन्त्री प्रकाश ज्वालां धयादीगु दु, ‘तत्काल बजेट हयेमाःगु दु, थुकिया निंतिं राजश्व कर्मचारी आवश्यक जुइ । अथेहे कानून दयेकेत कानून सम्बन्धी जानकार मनू माल । तर अज्याःपिं कर्मचारी खटे याना महःगुलिं समस्या जुयाच्वंगु दु ।’
कर्मचारीया हे अभावं आर्थिक कार्यविधि, सार्वजनिक खदिर ऐन थेंज्याःगु कानून तकं दयेके मफुगुलिं प्रदेश सरकारं यायेमाःगु विकास सम्बन्धी ज्या नं प्रभावित जुयाच्वंगु दु । न्हूगु कानून दयेकेत धकाः केन्द्र सरकारं छुं नमूना कानून धाःसा दयेका छ्वयातःगु दु । तर नमूना कानून मगाःगु धासें प्रदेश नं. ३ या मुख्यमन्त्री डोरमणि पौडेलं बिबिसीयात धयादीगु दु, ‘नमूना कानूनया आधारय् हे प्रदेश सरकारं कानून दयेकेगु खः, तर अज्याःगु नमूना कानून नं पूवंक बियातःगु मदु । कानूनया अभावय् हे ज्या न्ह्याकेत समस्या जुयाच्वंगु दु ।’कर्मचारीत दरबन्दी दुथाय् खटे मजुयाच्वंगु कारणं समस्या वःगु खँ पिहां वःगुलिं सरकारया प्रवक्ता मन्त्री थममाया थापां दरबन्दीइ मवंपिं कर्मचारीतय्त कारवाही यायेगु व स्पष्टीकरण कायेमाःगु अवस्था दुगु खँ धयादीगु दु ।कर्मचारीत खटे जुयामवंगुलिं सरकारं दरबन्दी ल्हातय् लाःगु २४ घण्टा दुने उगु थासय् मवंपिं कर्मचारीयात कारवाही यायेगु ख्याच्वः नं बिउगु खः । तर गुलिखे प्रदेशय् सचिव स्तरया कर्मचारी तकं अझं हाजिर जूवंगु मदुनि ।
LEAVE YOUR COMMENTS