ने. सं. ११४४ चौलागा पारू -

ह्वाइटवास थें हे

क्रिकेटय् ह्वाइटवास खँग्वः खूब हे छ्यलेगु याः । यदि छुं नं सिरिजय् छगू टिमं दक्वं कासा त्याकल धाःसा ह्वाइटवास धायेगु याः । थुगुसीया एसेज सिरिज सुरु जुइ ह््यः छगू कथं सकसिनं अनुमान याःगु खः, अस्टे«लियां इंग्ल्यान्डयात ह्वाइटवास याइगु जुइ । अथे धयागु न्यागू टेस्टया सिरिजय् अस्टे«लिया अःपुक हे ५–० त्याइगु जुइ । अस्ट्रेलियाल भूमिइ जुइत्यंगु सिरिज जूगुलि नं थथे अनुमान याःगु खः । न्हय्वाःया ‘इन्टेन्स’ क्रिकेट लिपा नकतिनि हे एसेज सिरिजया छगू मेगु संस्करण क्वचाःगु दु ।
सिरिजया लिच्वः धाःसा ह्वाइटवास मजुल । अथे धयाःगु अस्टे«लियां दक्वं टेस्ट त्याकेमफुत । छगू टेस्ट त्वःताः मेगु प्यंगुलि कासाय् धाःसा अस्टे«लिया हे त्यात । अथे धयागु सिरिज वयागु पक्षय् ४-० जुल । थ्व ल्याखं अस्टे«लियां ‘ह्वाइट वास’ याये मफुत । तर इंग्लिस क्रिकेटया आलोचकतय्सं थुकियात नं ह्वाइटवास थें खः धकाः धायेगु सुरु याःगु दु । उमिगु दाबी खः, छगू टेस्टय् इंग्ल्यान्ड पराजित मजूसां सिरिजय् टिमया स्थिति अन्ततः ह्वाइटवास थें हे जुल ।
थथे छाय् ले ? न्ह्यसः स्वाभाविक खः, अले लिसः नं स्पष्ट दु । प्रत्येक टेस्टय् छगू न छगू निर्णायक मोड वइ । व हे मोडय् छु टिम च्वय् लायेत सफल जुइ, जित वयागु हे जुइ । अस्टे«लियां थुगुसी थथे हे यात । अथे धयागु इंग्ल्यान्डं थुगुसीया एसेज सिरिजय् छतिं बांलाक म्हिते मफुत धयागु थ्यंक मखु । प्रत्येक टेस्टय् इंग्ल्यान्ड छगू इलय् बल्लाःगु स्थितिइ थ्यंगु खः, तर वं थ्व स्थितिया छतिं लबः काये मफु । अले छु माल, अस्टे«लिया न्ह्याब्लें च्वय् लात ।
अस्टे«लिया धाःसा थुकिया अःखः, थःगु टिम गुबलय् भचा कमजोर खनेदइ, उबलय् लाक्क हे तसकं गजबनक्सां म्हिताबी, दबाबय् नं कमजोर मजू । उकिं हे इंग्ल्यान्ड लिउने लात । थ्व हे खः, थुगुसीया एसेज सिरिजया विशेषता । अस्टे«लियाया सफलता लिउने कप्तान स्टिभ स्मिथया ब्याटिङ उत्तिकं निर्णायक साबित जुल । गुबलय् गुबलय् इंग्ल्यान्ड भचा बल्लाःगु खनेदइगु खः, उबलय् उबलय् थ्याक्क स्मिथं थःगु ब्याटपाखें शानदार कासा क्यनी ।
गुलिं गुलिं क्रिकेट पण्डितय्सं ला स्मिथ याकचां हे इंग्ल्यान्डयात बुकूगु खः धकाः तकं धाल । स्मिथ टेस्ट क्रिकेटय् नम्बर १ ब्याट्सम्यान खः, अले वं सिरिजया झ्वलय् थुकियात सिद्ध नं यानाक्यन । उकिं हे वयात आःया पुस्ताया क्रिकेट कासामिमध्ये दकलय् उत्कृष्ट ब्याट्सम्यान खः धाल । आः ला वयात पुलांम्ह डन ब्रेडम्याननाप तकं तुलना यायेगु सुरु जूगु दु । इंग्ल्यान्डया निंतिं धाःसा सिरिज धात्थें हे निराशाजनक साबित जुल । टिमया उपकप्तान जेम्स एन्डरसनं धाः थें पूरा सिरिजय् अस्टे«लिया धाथें हे थःगु टिमविरुद्ध हाबी जुल । थुकियात हे धाइ, ह्वाइटवास थें ।