प्यंगू वर्गया भुखाय् पीडितया छेँ दनेत प्राधिकरणया पहल
येँ – राष्ट्रिय पुनःनिर्माण प्राधिकरणं प्यंगू वर्गया भुखाय्पीडितया छेँ पुनःनिर्माणया निंतिं पहल न्ह्याकूगु दु । प्राधिकरणं जोखिमयुक्त पीडितया छेँ पुनःनिर्माणया निंतिं उकथं पहल न्ह्याकूगु खः ।प्राधिकरणं ७० दँ च्वय्या ज्याथजिथि, ६५ दँ पुलेधुंकूपिं अशक्त याकःमिसा व दृष्टिविहीन लगायत ह्याउँगु व वचुगु कार्डकयातःपिं अपांगता जूपिं व्यक्ति व १६ दँ क्वय्या नाबालिगया छेँ बसोबासया व्यवस्था यायेत कार्यविधि तयार यानाः लगत संकलनया ज्या न्ह्याकूगु खः । थ्व हे झ्वलय् प्राधिकरणया सूचना शाखां भुखाचं अतिप्रभावित झिंप्यंगू जिल्लाय् करिब १६,२०५ जोखिमयुक्त वर्गया लाभग्राहीया प्रारम्भिक तथ्यांक नं पिकाःगु दु । प्राधिकरणं स्थानीय सरकारपाखें नं अज्याःपिं लाभग्राहीया लगत माग याःगु दु ।
लाभग्राहीया ल्याः निश्चित जुइवं प्राधिकरणं परोपकारी संस्थायात छेँ पुनःनिर्माणा निंतिं आह्वान याइगु जूगु दु । थ्व सम्बन्धय् प्राधिकरणया प्रमुख कार्यकारी निर्देशक युवराज भुसाललगायतया अधिकारीतय्सं बेलायती विकास नियोग (डिफिड)या प्रतिनिधिलिसें सहलह नं यानादीधुंकूगु दु । प्राधिकरणया अधिकारीलिसें डिफिड नेपालया पुनःनिर्माण सल्लाहकार म्याग्नस मुरे व भुखाय् लिपाया पुनःनिर्माण समूहया प्रमुख लियोनार्ड टोडसहितिया पुचलं अशक्त वर्गया भुखाय्पीडितया छेँ निर्माण ढाँचा बारे सहलह याादीगु खः । थ्व हे झ्वलय् प्राधिकरणं छुट व पुनः जाँच सर्वेक्षणपाखें प्राप्त छगू लाख स्वयां अप्वः गुनासोयात अन्तिम प्रमाणिकरणया निंतिं थ्व हे फागुन मसान्ततकया दुने स्थानीय तहय् छ्वइगु जूगु दु ।
LEAVE YOUR COMMENTS