छाय् वल पाकिस्तानी प्रधानमन्त्री नेपालय् ?

बिबिसी- पाकिस्तानं थः प्रधानमन्त्री शाहिद खाकन अब्बासीया नेपाः भ्रमणयात दक्षिण एशियाली देय्लिसेया स्वापू थप विस्तार यायेगु निंतिं पहल कथं व्याख्या याःगु दु । निन्हुयंकंया औपचारिक भ्रमणया निंतिं प्रधानमन्त्री अब्बासी सोमवाः न्हिनय् येँय् थ्यंकःझाःगु खः । वय्कलं थः समकक्षी केपी शर्मा ओली व राष्ट्रपति विद्यादेवी भण्डारी लिसे निगू पक्षया हीतयात कयाः खँल्हाबल्हा यानादीगु खँ परराष्ट्र मन्त्रालयं धाःगु दु ।

पाकिस्तानी विदेश मन्त्रालयया कथं प्रधानमन्त्री अब्बासीया भ्रमणया उद्देश्य क्षेत्रीय देय्त लिसे स्वापू बांलाकेगु पाखे पलाः न्ह्याकेगु खः । आइतवाः पितबिउगु प्रेस विज्ञप्तिइ धयातःगु दु, ‘थ्व भ्रमणया झ्वलय् सार्कयात छगू बल्लाःगु व महत्वपूर्ण क्षेत्रीय संगठन गुकथं दयेकेगु धयागु बारे सहलह जुइ ।’

नेपालय् नकतिनि क्वचाःगु संसदीय चुनावलिपा वामपन्थी दलया शक्तिशाली सरकार वयेधुंकाः नेपाm भ्रमणय् वःम्ह अब्बासी न्हापांम्ह विदेशी सरकारया प्रमुख खः । थ्व भ्रमणय् नेपाःलिसे व्यापार, शिक्षा, पर्यटन, रक्षा व जनसम्पर्क थेंज्याःगु विषयय् खँल्हाबल्हा यायेगु खँ पाकिस्तानं धाःगु दु । पाकिस्तानं सार्कया बारे नं सहलह जुइ धाःसां नेपाःया परराष्ट्र मन्त्रालयं धाःसा थ्व बारे छुं न्ह्यथँगु मदु ।

नेपाः थौंकन्हय् सार्कया अध्यक्ष जुयाच्वंगु दुसा पाकिस्तानयात उगु जिम्मेवारी हस्तान्तरण यायेत पियाच्वंगु दु । सार्क शिखर सम्मेलनया ग्वसाः ग्वयाः सन् २०१६ य् पाकिस्तानं सार्कया अध्यक्षया जिम्मेवारी लःल्हाना कायेत्यंगु खः । तर युरीइ च्वंगु थःपिनि सैनिक व्यारेकय् जूगु आक्रमणय् पाकिस्तानया ल्हाः दुगु द्वपं बियाः भारतं तिथि क्वःछिना तयेधुंकूगु सम्मेलन हे बहिष्कार यानाबिल । थ्व लिपा अफगानिस्तान, बंगलादेश व भूटानं नं ब्वति मकायेगु धाःगुलिं सार्क शिखर सम्मेलन हे स्थगित जूगु खः । उबलय् निसें पाकिस्तानय् जुइमाःगु १९ औं शिखर सम्मेलन अनिश्चित जुयाच्वंगु खः ।

त्रिभुवन विश्वविद्यालयया अन्तर्राष्ट्रिय सम्बन्ध विभागया प्रमुख खड्ग केसीं अन्तर्राष्ट्रिय रुपं याःचा जुयावनाच्वंगु पाकिस्तानं सार्कय् थःगु भूमिका अप्वयेकेगु कुतः यानाच्वंगु खँ धयादी ।

वय्कलं धयादी, ‘विशेषतः राष्ट्रपति ट्रम्प सत्ताय् वयेधुंकाः पाकिस्तानया अमेरिकालिसे न्हापा थें बांलाःगु स्वापू मदु । अमेरिकां नं इन्डो प्यासिफिक एलाइन्स धकाः भारतलिसेया स्वापुतिइ हे अप्वः बः बियाच्वंगु दु । थौंकन्हय् पाकिस्तान चीनया बेल्ट एण्ड रोड अवधारणाया प्रमुख साझेदार नं खः । तर अमेरिकाया साथ मदुगुलिं क्षेत्रीय स्तरय् भारतलिसे प्रतिस्पर्धा यायेत वया आत्मविश्वास भचा कमजोर जूगु खनेदु ।’

‘नेपालय् नं न्हूगु व आत्मविश्वास प्रकृतिया सरकार वःगुलिं सार्कयात क्रियाशील यानाः थ्व क्षेत्रय् थःगु भूमिका भचासां बांलाकेगु वयागु चाहना जुइफु ।’

नेपाःया अधिकारीतय्सं नं पाकिस्तानया तत्परताय् हे प्रधानमन्त्री अब्बासी येँय् झायादीगु पुष्टि याःगु दु । प्रधानमन्त्री लिसे सतिम्ह एमाले नेता राजन भट्टराईया कथं पाकिस्तानी प्रधानमन्त्री लिसे दुई पक्षीय मामिलाय् सहलह यायेगु ओलीया तयारी दु । ‘आःतक निगू पक्षीय विषयवस्तुया बारे जक सहलह यायेगु तयारी यानागु दु । तर वय्कःया प्रस्तावय् सार्कबारे नं खँल्हाबल्हा जुइफु ।’

इस्लामाबादपाखें जूगु उच्च तहया नेपाः भ्रमणयात कयाः पाकिस्तानया परम्परागत प्रतिद्वन्द्वी भारतं नं चिउताः प्वंका हयाच्वंगु दु ।

भारतया ‘द हिन्दू’ पत्रिकाया कुटनीतिक सम्पादक सुहासिनी हैदरं सामाजिक सञ्जाल ट्विटय् च्वःगु दु, ‘पाकिस्तानी प्रधानमन्त्री अब्बासी प्रधानमन्त्री ओलीयात नापलायेत नेपाः वनेत्यंगु दु… येँ नं भारतयात स्वयां न्ह्यः ब्वंगु खःकि प्रधानमन्त्री मोदी वने मफुगु खः ?’

सम्बन्धित बुखँ

LEAVE YOUR COMMENTS