कुप्रचारया झ्वलय् पुष्पलालयात प्रहार

नेपाल कम्युनिष्ट पार्टीया स्थापना २००६ सालय् पुष्पलाल श्रेष्ठं याःगु मखु, मनमोहन अधिकारीं याःगु खः हँ ! थ्व खँ झापा संघर्षया शीर्ष व्यक्तित्व मोहनचन्द्र अधिकारीं धाःगु धकाः वय्कः अधिकारीलिसे अन्तर्वार्ता कायेगु झ्वलय् ‘३ घुम्ती अनलाइन टिभी’या उमेश सुवेदीं भूमिकाय् धाल । धाथें मोहनचन्द्र अधिकारीं हे थ्व खँ धयादीगु खःला ले ? अन्तर्वार्ताया झ्वलय् मोहनचन्द्र अधिकारीं धाःगु दु, ‘नेपाल कम्युनिष्ट पार्टीया स्थापना पुष्पलालं याःगु खः धकाः धायेगु चलन दु, तर पुष्पलाल स्वयां न्ह्यः कम्युनिष्ट जूम्ह मनमोहन अधिकारी खः । सन् १९४२ य् हे वय्कः कम्युनिस्ट जूम्ह खः ।’ अले हाकनं वय्कलं धयादिल – ‘पुष्पलाल नेपाली कांग्रेसया अफिस सेक्रेटरी खः, कांग्रेसय् भागबण्डा मिले मजूगु कारणं यानाः कम्युनिष्ट पार्टी चायेकूगु खः ।’

पृथ्वीनारायण शाहं स्वनिगलय् खुनी हमला याःगु खः धकाः वसन्तपुलिइ भाषण बीगु झ्वलय् न्ववाःगु व महाकाली सन्धिया विपक्षय् दंगु कारणं यानाः वय्कःया पार्टी सत्ताय् दुसां मोहनचन्द्र अधिकारी वहिष्करणय् लानाच्वंम्ह मनू खः । झीसं सिउकथं खँ थुकथं खः । तर वय्कः अधिकारीया पक्षय् वनेमाःगु व पुष्पलाल श्रेष्ठ थेंज्याःम्ह व्यक्तित्वयात क्वत छ्वयेकथं न्ववायेमाःगु छाय् ? थ्व न्ह्यसः ब्वलंगु दु। मोहनचन्द्र भाजुं पुष्पलालं स्थापना याःगु खँयात नकारे यानादीमफु। तर पुष्पलाल स्वयां न्ह्यः मनमोहन अधिकारी व्यक्तिगत रूपं कम्युनिष्ट जुइधुंकूगु खः धइगु जक वय्कःया दावी खः । अले कम्युनिष्ट पार्टी स्थापना यायेगु झ्वलय् दुपिं कम्युनिष्टत मुंकाः मयासें पुष्पलालं प्यम्ह जक मुनाः यात धइगु नं वय्कःया द्वपं खः । तर अन्तर्वार्ता काःम्ह मनुखं हाकनं चाःहुइकाः न्यन, ‘पुष्पलालं छगूकथं स्थापना यात व मनमोहन अधिकारीं मेगुकथं यात मखुला ? लिसः बिउम्ह मोहनचन्द्र अधिकारीं मनमोहनं स्थापना याःगु धइगु गनं डकुमेन्ट मदुधाल । न्यंम्हेस्यां धाल – ‘डकुमेन्ट मदुगु कारणं जक धाये मफुगु खःला ?’

नेपाल कम्युनिस्ट पार्टी स्थापना पुष्पलालं याःगु खः धइगु खँ थौं ७० दँ पुलेधुंकाः नं छुं विवाद वःगु मदु। मनमोहन अधिकारी नं व हे कम्युनिस्ट पार्टीइ दुहां वनाः छगू धारया नेतृत्व यानाः २०४३ सालय् पुष्पलाल पुचःया नेतृत्व यानाच्वंम्ह साहना प्रधानया पार्टीनाप एकीकरण यानाः नेकपा (मार्क्सवादी) जूगु अले २०४७ सालय् व हे मोहनचन्द्र दुगु मालेनाप एकीकरण यानाः एमालेया नायः जुयाः २०५१ सालय् प्रधानमन्त्री तकं जुया झाःम्ह खः । मनमोहन अधिकारी स्वयं गुम्ह गुमनाम वा मूलधारं वहिष्करणय् लानाः छुं खँ प्रकाश याये मफुम्ह नं मखु। थुकथं ७० दँ तक निर्विवाद तथ्य व यथार्थया रूपय् स्थापित खँयात विवादय् हयेगु आँट गनं वल ? थ्व कम्युनिष्ट पार्टीया स्थापना याःम्ह मनू छम्ह नेवाः खः धकाः सह याये मफुगु जकं मखुला? थ्व न्ह्यसः दनावःगु दु ।

कम्युनिष्ट पार्टीया स्थापना याःम्ह पुष्पलाल श्रेष्ठ हे खःसा मेपिं संस्थापकपिं नारायणविलास जोशी, नरबहादुर कर्माचार्य व निरञ्जनगोविन्द वैद्य खः । उकथं हे मोतीदेवी श्रेष्ठ नं उगु ईया ग्वाहालिमि खः । उगु दिं अप्रिलया २२ तारिख खः ।

पुष्पलाल राष्ट्रिय कांग्रेसया अफिस सेक्रेटरी खः । थुकिया नेतृत्व डा. डिल्लीरमण रेग्मीं यानाच्वंगु खः । लिपा थ्व कांग्रेस व वीपीया नेपाली कांग्रेसनाप एकीकरण जुयाः नेपाली राष्ट्रिय कांग्रेस जूगु खः । थुकिया बारेया ग्रीष्मबहादुर देवकोटाया ‘नेपालको राजनीतिक दर्पण’ धाःगु सफुतिइ स्पष्ट च्वयातःगु दु। देवकोटां घटना विवरणया टिपोट न्ह्यब्वयादीगु खः । उखेंथुखें मालाः आःयापिंसं थें थेसिस च्वयादीगु नं मखु। उकिं थ्व यथार्थ दर्पण हे खः । थुकी विवाद यायेगु थाय् आःतक वःगु मदुनि, वइ नं मखु ।

गन तक झीसं सिउ, नेपालय् दकलय् न्हापां कम्युनिष्ट जुयागु दावी यानावयाच्वंम्ह धइम्ह गंगालाल हलुवाई खः । वय्कः २००३ सालय् कम्युनिष्ट जुयादीम्ह खः । बांलाक प्रचारय् मवःगु जूसां वय्कःयात लाल कम्युनिष्ट धाइगु व वय्कःया संगठनयात नं लाल कम्युनिष्ट पार्टी धाइगु झीसं लुमंकथं सिउ ।

गन तक मनमोहन अधिकारीया सवाल दु, वय्कः वनारसय् बिएस्सी ब्वनाच्वनादीगु इलय् हे भारत छोडो आन्दोलनय् ब्वति कयाः जेलय् लाःम्ह खः । लिपा वय्कः भारतीय कम्युनिष्ट पार्टीया सम्पर्क वःम्ह खः । २००४ सालय् विराटनगर जुट मिलय् जूगु मजदुर हडतालय् वय्कः नं छम्ह नेता खः । तर थुकिया मेपिं नेतात धइपिं गिरिजाप्रसाद कोइराला, तारिणीप्रसाद कोइराला जूगुलिं थ्व ल्याखं मनमोहन अधिकारीयात कम्युनिष्ट जुयाः मजदुर हडतालय् ब्वति काःगु धकाः धाये फइमखु ।

नेपालय् न्हापलाक गंगालाल हलुवाइ, रत्नप्रसाद ब्राह्मणपिं कम्युनिष्ट जूगु खनेदु धाःसा मनमोहन अधिकारी नं २००६ साल वैशाख १० स्वयां न्ह्यः हे कम्युनिष्ट जुइधुंकूगु खः धायेगुली छुं समस्या मदु। तर कलकत्ताया छम्ह बंगालीया छेँय् च्वनाः नेपाल कम्युनिष्ट पार्टीया स्थापना याःम्ह पुष्पलाल श्रेष्ठ हे खःसा मेपिं संस्थापकपिं नारायणविलास जोशी, नरबहादुर कर्माचार्य व निरञ्जनगोविन्द वैद्य खः । उकथं हे मोतीदेवी श्रेष्ठ नं उगु ईया ग्वाहालिमि खः । उगु दिं अप्रिलया २२ तारिख खः । वयां लिउया सेप्टेम्बर १५ कुन्हु घोषणापत्र पिकायेगु ज्या नं पुष्पलालं हे याःगु खः । अले कार्ल मार्क्स व फ्रेडरिक एन्गल्सं तयार याःगु सन् १८४८ य् पिहां वःगु कम्युनिष्ट पार्टीया घोषणापत्रयात खस नेपाली भासं न्हापांगु अनुवाद यानाः पिथनादीम्ह नं पुष्पलाल हे खः ।

वि.सं १९९४ य् बूम्ह मोहनचन्द्र अधिकारीया बाज्या नं कांग्रेस, अबु नं कांग्रेस खः । तर प्रजातन्त्र वयेधुंकाः २००८ सालय् विराटनगर जुट मिलय्जू गु हडतालयात मातृका नेतृत्वया कांग्रेस सरकारं दमन याःगु खनाः वय्कः १४ दँया बय्सय् हे कांग्रेसपाखें मोह भंग जूम्ह जुयाच्वन । वय्कः स्वयं नं पुष्पलालया कम्युनिस्ट पार्टीइ संगठित जूम्ह खः । २०२८ सालय् झापाय् जूगु नक्सलवादी प्रभावित वर्गशत्रु सफाया अभियानय् वय्कः कोशी प्रान्तीय कमिटीया दुजः जुयाः झापा व मोरङ्ग स्वइम्ह इञ्चार्ज जुयाच्वंम्ह खःसा राधाकृष्ण मैनाली झापा जिल्ला कमिटीया नायः खः । मूल कम्युनिष्ट पार्टीया निर्देशन मदयेक कोशी प्रान्तपाखें झापा स्वइम्ह मोहनचन्द्र व झापा जिल्ला कमिटीइ च्वनाच्वंपिं मनूत मिले जुयाः वर्ग शत्रु सफाया संघर्ष न्ह्याकूगु खः ।

उकिं मोहनचन्द्रया कम्युनिष्ट पार्टीइ ब्यागलं भूमिका ला २०२८ सालय् तिनि खनेदुगु खः । भरत मोहन अधिकारी अबलय् कोशी प्रान्त कमिटीया नायः जुयाच्वन । २०२८ सालया अभियान लिपा भारत निर्वासित जुइमाःगु व लिपा नेपाः दुहां वःबलय् जेलय् लाःगु हुनिं यानाः मोहनचन्द्र अधिकारीया जरा पुलांगु कम्युनिष्टलिसे स्वाःगु जूसां म्ह विकसित हे मेकथं जूम्ह खः । उकिं वय्कःया खँयात आधिकारिक तायेके फइमखु ।

सम्बन्धित बुखँ

LEAVE YOUR COMMENTS