‘मधेश’ नांयात नेकपा, कांग्रेसया आपत्ति
येँ- प्रदेश नम्बर २ या नामाकरण सत्तारुढ दलत व विपक्षी दलतय् दथुइ म्हिगः च्वंगु बैठकं नं छुं लिच्वः पिहां मवल । सभामुख सरोजकुमार यादव नेतृत्वया उच्चस्तरीय संसदीय समितिया म्हिगः च्वंगु बैठकय् प्रदेशया नां बारे सहलह जूगु खः ।
बैठकय् मुख्यमन्त्री लालबाबु राउत, राजपा संसदीय दलया नेता लिसें भौतिक पूर्वाधार विकास मन्त्री जितेन्द्र सोनल, प्रमुख प्रतिपक्षी नेपाल कम्युनिष्ट पार्टीया संसदीय दलया नेता सत्यनारायण मण्डल व नेपाली कांग्रेस संसदीय दलया नेता रामसरोज यादव लिसें प्रदेशसभाया फुक्कं दलया सचेतकपिंसं ब्वति काःगु खः ।
बैठकय् नेकपा व कांग्रेसया नेतातय्सं थःपिंसं प्रस्ताव यानागु नांया लिउने ‘मधेश’ शब्द तयेगु खःसा सहमति जुइ फइगु खँ धाःगु खः । नेकपां थःपिंसं प्रस्ताव यानागु ‘जानकी प्रदेश’ धइगु नांया लिउने ‘मधेश’ थपे यानाः ‘जानकी मधेश प्रदेश’ तयेगु खःसा उकी थःपिनिगु सहमति दइगु खँ धाःगु खः । उकथं हे कांग्रेसं ‘मिथिला मधेश’ नां तयेगु खःसा थःपिनिगु समर्थन दइगु प्रस्ताव तःगु खः ।
तर प्रदेशया सत्तारुढ दलत समाजवादी पार्टी व राजपां धाःसा प्रदेशया नां ‘मधेश’ जक तयेगु धकाः अडान कयाच्वंगु दु । बैठकय् मुख्यमन्त्री राउतं देशय् संघीयता स्थापना यायेगु नितिं मधेश आन्दोलनं बिस्कं भूमिका म्हितूगु धासें उकियात सम्मान यायेगु कथं नं प्रदेशया नां मधेश तयेमाःगु बिचाः तयादीगु खः । थुकिया बारे थौं हानं बैठक च्वनेत्यंगु दु । थौंया बैठकं नं निर्णय यायेत धाःसा थाकुइगु खँ धाःगु दु । सत्तारुढ समाजवादी व राजपां मेगु शब्द थपे यानाः जूसां ‘मधेश’ नांयात स्वीकार याःगुली धाःसा कांग्रेस व नेकपायात सुभाय् बिउगु दु ।
LEAVE YOUR COMMENTS