नेवाः न्ह्यलुवापिनि मंकाः आह्वान

येँ – नेवाः न्ह्यलुवापिं जनकवि दुर्गालाल श्रेष्ठ, मल्ल के. सुन्दर, डा. महेशमान श्रेष्ठ, राजेन्द्र श्रेष्ठ, तीर्थराम डंगोल, दिलीप महर्जनपिंसं छगू मंकाः वक्तव्य पित बिसें प्रदेश ३ या नां ‘बागमती’ तयेगु लागिं सत्तारुढ दल नेकपां थःगु असंवैधानिक, असंसदीय व अलोकतान्त्रिक निर्देशन हूबहु पालना याकेत सार्वभौम प्रदेशसभाया सांसदपिंत विवश याःगुलिं उकिया विरोध यानादीगु दु ।

मंकाः वक्तव्यय् झिदँया जनयुद्ध, जनआन्दोलन, मधेस आन्दोलन व जनजाति आन्दोलनया उपलब्धीयात समाप्त यायेगु षडयन्त्र जूगु महसुस जूगु खँ नं धयातःगु दु। वक्तव्यय् धयातःगु दु, ‘लिसें जनताया पक्षय् खबरदारी यानाच्वनेमाःगु प्रतिपक्षी दलतय्गु रवैया व पिछलग्गुपनप्रति नं खेद ब्यक्त यानाच्वना । नापं ३ नं. प्रदेशया नां तत्काल संशोधन यानाः ‘नेवाः ताम्सालिंङ’ प्रदेश तयेत माग यानाच्वना ।’

‘नेकपा नेतृत्वं गणितीय बहुमतया बलं संघीय लोकतान्त्रिक गणतन्त्रयात एकल जातीय शासनय् परिणत यायेत्यंगु बहुभाषी, बहुजातीय, बहुसाँस्कृतिक, बहुधार्मिक नेपाःमि जनतायात गुगुं नं कथं स्वीकार्य जुइमखु। उकिं थ्व इलय् संघीयताया सिद्धान्तया रक्षा, नेवाः पहिचानया रक्षा, नेवाः भूमि, संस्कृति सम्पदा व नेवाः जनजिबिकाया नितिं नेवाः समुदायं निरन्तर संघर्ष याइगु घोषणा यानाच्वना । थुगु दीर्घकालीन संघर्षय् साथ, समर्थन व सहभागिताय् नापं जायेत सकल न्याय समानता, पहिचान व संघीयता पक्षधर आदिवासी जनजाति व उत्पीडित जनतायात अपिल यानाच्वना’ वक्तव्यय् धयातःगु दु ।

सम्बन्धित बुखँ

LEAVE YOUR COMMENTS