चाबहली अन्तर्राष्ट्रिय त्रिपिटक पाठ जुइगु
येँ – नेपाल भ्रमण वर्षयात राष्ट्रिय व अन्तर्राष्ट्रिय तहया प्रवद्र्धन यायेत वइगु माघ २५ व २६ गते अन्तर्राष्ट्रिय त्रिपिटक पाठ याइगु जूगु दु । चारुमति बुद्धिष्ट मिसन नेपाल व थाइ इण्डो चाइना फ्रेन्डसिप एशोसियसनया मंकाः ग्वसालय् चाबही स्तुपाया न्ह्यःने जुइगु ज्याझ्वलय् नेपाल, भारत, श्रीलंका, थाइल्यान्ड, म्यानमार व लाओसया थ्यंमथ्यं निसःम्ह भिक्षु भिक्षुपिं, गुरुमा, लामा, आनी व उपासक उपासिकापिनि सहभागीता दइगु खँ धाःगु दु। थ्व कार्यक्रमया प्रचार प्रसारया निंतिं साइकल र्याली नं याइगु जूगु दु ।
ज्याझ्वःया न्हापांगु न्हि कुन्हु जुइगु साइकल र्याली धुंकाः त्रिपिटक वाचन सुरु जुइ । नेपाल थाइ सांस्कृतिक नृत्य, कूलपुत्र प्रवज्या लगायतया ज्या जुइगुलिं थ्व झ्वःयात ऐतिहासिक महत्व कथं न्ह्याकागु खँ ज्याझ्वःया संयोजक भिक्षु तपस्सी धम्म महास्थवीरं धयादीगु दु ।
मंकाः कथं त्रिपिटक वाचन ज्याझ्वलं सकारात्मक ऊर्जा प्रवाह यानाः सत्मार्गय् वनेत प्रेरित याइगु जूगुलिं शान्तिपूर्ण वातावरण दयेकाः सकसियां कल्याण जुइगु विश्वास आयोजक समितिया दु। ज्याझ्वःया निंतिं येँ महानगरपालिका, बागमति प्रदेश अन्तर्गतया पर्यटन विकास आयोजनां ग्वाहालि याइगु खँ धाःगु दु ।
LEAVE YOUR COMMENTS