थःथःगु स्वभाव

दशराज शाक्य

लाखे गुभाःजु शंखमूल खुसिइ म्वःल्हुयाः वयेधुंकाः सुद्र्यःयात अघ्र्य बियाः ज्वजलपा यानाच्वन । ज्वजलपा यानाच्वंगु ल्हातय् गनं गनं ब्वयावःम्ह वाउँभत्तुया पपू स्यानाः ब्वये मफयाः कुतुं वनाः लाखे गुभाजुया ल्हातय् लात । काचाकिचिं भत्तुयात ज्वनाः वयागु म्हय् छु जूगु धकाः जाँच यानास्वल । सुनां सुनां नतूचां कयेकाहःगु जुयाच्वन । अले घाःपाः जूम्ह वाउँभत्तुयात छेँय् हयाः घाः जूगु म्हय् हलूचिकंबुलाः पानाबिल । घाः लनेधुंकाः वाउँभत्तुयात छम्ह बांलाःम्ह मिसामचाया स्वरुपय् हिलाबिल, थःगु तन्त्रविद्यां ।

झिदँ तक तपस्या यानाः लाखेगुभाःजुं तन्त्रज्ञान सयकातःगु जुयाच्वन । वाउँभत्तुं मिसामचा जूम्हेसित थः हे म्ह्याय्मचा थें यानाः लहिनातल । ल्यासे जुयावःलिसे मिसामचा तसकं न्यासिचायाः जुइगु बानी जुयावल । ब्याहा यायेगु ई त्ययावःबलय् लाखेगुभाःजुं छम्ह लमिमार्फत् बांलाःम्ह मिजं छम्ह मायेकेछ्वल । लमिं छम्ह भाजु मालाहल । व भाजु क्यनाः लाखेगुभाःजुं थः म्ह्याय्यात धाल, ‘का मैंचा । थ्व भाजुलिसे छं ब्याहा यायेमाः । वलिसे छन्त ब्याहा यानाबीगु पक्का जुल ।’

‘व भाजु जितः मयः, सुपाँय् थें हाकुसे च्वं’ म्ह्याय्म्हं लिसः बिल ।

थज्याःगु लिसः न्यनाः लाखेगुभाःजुं मेम्ह मिजं मालाहिं धकाः लमियात उजं बिल । देय् धयाः लमि थःगु लँय् वनाछ्वत । लमिं छगू जुक्ति पिकाल । लमिं मेम्ह छम्ह तन्त्रमन्त्र न्याक्क सःम्ह सिंहगुभाःजुयाथाय् वनाः धाःवन, ‘थ्व भम्चायात बांलाःम्ह व गति लाःम्ह भाजु छम्ह छःपिंसं मालाबिज्याहुँ ।’

भमचाया किपा स्वयाः मिखा तिसिनाः ध्यान यानाः बिचाः यात सिंहगुभाःजुं । ध्यानया सूरय् थ्व भमचामय्जु ला छम्ह बांलाःम्ह वाउँभत्तु लानाच्वन खनिसा धयागु सीकल, अले लमियात सिंहगुभाःजुं धाल, ‘छं छम्ह बांलाःम्ह वाउँभत्तु मालाहिँ ।’

थ्व खँ न्यनाः लमि छझाः पाकः थें ज्यः जुल । खँ थुइकेमफुत लमिं । सिंहगुभाःजुं लमियात थुकिया रहस्य नं कंबलय् लमि उकथं हे वाताहाँ जूगु खः । अथे खःसां लमिं ‘दय्’ धयाः मिजंम्हवाउँभत्तु मालाहल । थ्व वाउँभत्तु स्वयाः सिंहगुभाःजुं लमियात धाल, ‘आम वाउँभत्तुयात ब्वनाः व बांलाःम्ह भम्चा मय्जुयात क्यनेयंकी । वं मयः धाइमखु।’

थ्व खँ न्यनाः लमि अजू चाल । न्वनि मवासे लमिं वाउँभत्तुयात पञ्जलय् तयाः ज्वनावन । थ्व वाउँभत्तुयात स्वयाः छुं धाये मलाःनि लाखेगुभाःजुया म्ह्याय्म्ह ‘आहा !’ धकाः हालाहल । अले लाखेगुभाःजुं थः म्ह्याय्यात धाल, ‘छन्त थ्व वाउँभत्तु लिसे हे ब्याहा यानाबीग जुल ।’

म्ह्याय्म्हं ‘जिउ जिउ’ धकाः लिसः बिल व स्वीकृति भावं छ्यं संकल ।

लाखेगुभाःजुं थःगु तन्त्रशक्तिं हाकनं थः म्ह्याय्यात वाउँभत्तुया हे स्वरुप बियाः मिजंम्ह वाउँभत्तुलिसे ब्याहा यानाबिल । व लमियात छुं नगद व कोश्याली द्वहलपा बियाः बिदा बियाछ्वत ।

उपिं वाउँभत्तु छज्वः यच्चुगु सर्गतय् आनन्दं ब्वयावन

सम्बन्धित बुखँ

LEAVE YOUR COMMENTS