पुलिसविरुद्ध एनआरटीया जित

येँ – शहीद स्मारक ए डिभिजन लिगया म्हिगः जूगु कासा दर्शन गुरुङया छगू जक गोलया ग्वाहालिं एनआरटीं नेपाल पुलिस क्लब विरुद्ध महत्वपूर्ण विजय चूलाकूगु दु । म्हिगः जूगु कासाय् ७६ औं मिनेटय् गुरुङ छगू जक विजयी गोल याःगु खः । राजेश परियारया पासय् दर्शनं पेनाल्टि बक्सं बांलाःगु प्रहार यासें गोल याःगु खः ।

लिगया थुगु सिजनया खुगू कासा म्हितेगु झ्वलय् एनआरटीं स्वंगू त्याकूगु दुसा छगू बराबरी व निगुलिइ पराजित जूगु खः । थ्व ल्याखं एनआरटीया १० ल्याः दयेमाःगु खःसा वंगु सिजनय् दकलय् लिउने लाःगुलिं २ अंक म्हो याःगुलिं आः एनआरटीया ८ ल्याः जक जूगु दु ।
पुलिस क्लबया नं ८ हे ल्याः दुसां गोल अन्तरया ल्याखं धाःसा एनआरटी स्वयां लिउने लाःवंगु दु । एनआरटी आः ल्याः धलखय् खुगूगु थासय् दुसा पुलिस क्लब न्हय्गूगु थासय् कुहांवंगु दु ।

मेखे म्हिगः हे जूगु च्यासल युथ क्लब व नेपाल एपिएफ क्लब दथुया कासा धाःसा बराबरीइ क्वचाल । निगुलिं टिमं गोल यायेमफयेवं कासा गोलरहित बराबरी जूगु खः । बराबरी लिपा च्यासलया ६ अंक जूगु दुसा एपिएफया ५ अंक  जूगु दु ।

सम्बन्धित बुखँ

LEAVE YOUR COMMENTS