मस्तय्त दबाब बियाः भाय् स्यनेफइमखु

येँ – मस्तय्त नेवाः भाय् ल्हायेकेगु खःसा दबाब बियाः जक ल्हाकेफइमखु, उमिसं हे मसिइक, मचायेका ल्हाका यंकेफःसा जक मस्तय्त नेवाः भाय् ल्हायेकफइगु खँ धाःगु दु । उदाय समाजपाखें रेडियो उपत्यकाय् न्ह्याका वयाच्वंगु नेवाः ज्याझ्वः ‘उदाय सः’ १५० ब्व थ्यंगु लसताय् जूगु छगू ज्याझ्वलय् न्ववानादिसें उदाय समाजया नायः व नेपाःया नांजाःम्ह व्यवसायी डा. रुपज्योति कसाःनं थ्व खँ धयादीगु खः ।

शनिवाः ग्राण्डी सिटी अस्पतालया सभाकक्षय् जूगु ज्याझ्वलय् न्ववानादिसें वय्कलं धयादिल, ‘मस्तय्त नेवाः भाय् ल्हायेकेगु खःसा उमित यइगु बाखं, कार्टुन, म्येँ आदि नेवाः भासं दयेमाः । उकिया निंतिं थौंकन्हय् मस्तय् दथुइ लोकंह्वाःगु कार्टुनतय्त नेवाः भासं अनुवाद यानाः क्यनेगु, नेवाः भासं बांबांलाःगु मचा म्येँ पिकायेमाः ।’

ज्याझ्वलय् ‘उदाय सः’ व्यवस्थापन पुचःया कजि डा. ज्ञानेन्द्ररत्न तुलाधरं ‘उदाय सः’ ज्याझ्वःया बारे न्ववानादीगु खः । अथेहे थुगु ज्याझ्वः न्ह्याका वयाच्वनादीम्ह विगेन तुलाधर, स्क्रिप्ट च्वयादीम्ह सुगतरत्न सिन्दुकार लिसें ज्याझ्वःया निंतिं अक्षय कोष नीस्वनेत ग्वाहालि यानादीपिंत मू पाहाँ रेडियो उपत्यकाया नायः प्रचण्डमान वज्राचार्य, उदाय समाजया नायः व सभापति रुपज्योति कसाः नं खादां क्वखायेकाः लुमन्ति चिं लःल्हाःगु खः । ज्याझ्वलय् नेवाः राष्ट्रिय पत्रकार दबूया नवनिर्वाचित केन्द्रीय कार्यसमितिया दुजःपिंत नं भिंतुना देछाःगु खः ।

ज्याझ्वलय् न्ववानादिसें पत्रकार दबूया केन्द्रीय नायः सुरजवीर वज्राचार्य पत्रकार दबू धयागु नं नेवाःतय् सः जूगु धासें सञ्चारख्यलय् नेवाःतय् बारे सः थ्वयेकेगु निंतिं दबुलिं मदिक्क ज्या याइ धयादिल । थ्व झ्वलय् वय्कलं नेवाः पत्रकार दबूया दुजः जुयाः नं नेवाः भाय् खँल्हाये मसःपिं स्वनिगः पिनेया नेवाःतय्त नेवाः भाय् स्यनेगु तयारी जुयाच्वंगु जानकारी बियादिसें थुकिया निंतिं समाजपाखें ग्वाहालि जुइगु विश्वास प्वंकादिल ।

ज्याझ्वलय् प्रदेश नं. ३या सांसद केशव स्थापितं नेवाः नसाःज्वलंया प्रचार यानाः व्यावसायी रुपं नेवाः नसाज्वलंयात यंकेगु निंतिं थःपिंसं न्ह्याका च्वनागु ‘नेवाः लहना’ देय्न्यंकं विस्तार यानायंकेगु ज्या थःपिं न्ह्यानाच्वनागु खँ धयादिल । आः पोखरा व धरानय् नं ‘नेवाः लहना’ चायेकेगु तयारी जुयाच्वंगु खँ वय्कलं धयादिल ।

ज्याझ्वलय् उदाय समाजपाखें न्ह्याका वयाच्वंगु ‘उदाय म्युजिम’ बारे डा. सुमनकमल तुलाधर व समाजपाखें यायेत्यंगु संघ दान बारे कजि मीना तुलाधरं जानकारी बियादीगु खः ।

सम्बन्धित बुखँ

LEAVE YOUR COMMENTS