नेपाली जातया च्या उत्पादन यायेत अनुसन्धान सुरु
येँ – वइगु न्यादँ दुने नेपाली जातया च्या उत्पादन यायेगु निंतिं राष्ट्रिय कृषि अनुसन्धान केन्द्र अध्ययन ज्या सुरु याःगु दु । धनकुटाया पाख्रीबास नगरपालिकाय् च्वंगु कृषि अनुसन्धान केन्द्रं विश्व बजारय् नेपाःया थःगु हे म्हसिका दइकथंया नेपाली ब्राण्डया च्याया अनुसन्धान सुरु याःगु खः । च्या ख्यलय् वंगु झिदँ न्ह्यवनिसें छुं हे ज्या मयासे च्वनाच्वंगु केन्द्रं आः बिस्कं हे ज्याकू स्थापना यानाः च्याया अनुसन्धान सुरु याःगु खः ।
राष्ट्रिय व्यावसायिक कृषि कार्यक्रम अन्तर्गत इलेक्ट्रोनिक ड्रायर व रोलिङ मेसिन तयाः अर्थोडक्स चियाया गुण परीक्षण यायेगु लिसें न्हूगु च्याया जात अनुसन्धान सुरु यानागु खँ धनकुटा केन्द्रया निमित्त प्रमुख महेन्द्रप्रसाद यादवं धयादीगु दु । थ्व अनुसन्धान लिपा थःगु हे गुण व जात दुगु नेपाली च्या उत्पादन जुइगु खँ धाःगु दु । केन्द्रं वइगु न्यादँ दुने नेपाली जातया हे चिया तयार यानाः विश्वबजारय् यंकेगु योजना कथं थ्व अनुसन्धान सुरु याःगु खः ।
नेपाली च्याया जात मदुगु कारणं थीथी समस्या वयाच्वंगु धासें अनुसन्धान सुरु याःगु खः । थुकिया निंतिं केन्द्रया न्हय्म्ह वैज्ञानिकतय्सं धनकुटा व इलामया स्वंगू थासय् अर्थोडक्स च्याया अनुसन्धान यानाच्वंगु खँ निमित्त प्रमुख यादवं कनादीगु दु ।
केन्द्र झापाय् उत्पादन जुइगु सिटिसी च्या व मेमेगु जिल्लाय् उत्पादन जुयाच्वंगु च्याया नं अनुसन्धान यायेगु तयारी यानाच्वंगु दु ।धनकुटाय् थांैकन्हय् ५१४ हेक्टर बुँइ च्या खेती जुयाच्वंगु खँ चिया तथा कफी बोर्ड हिलें धाःगु दु ।
वि.सं. २०३९ सालय् तत्कालिन जुजु वीरेन्द्र शाहं च्या क्षेत्र घोषणा याःगु पूर्वया झापा, इलाम, पाँचथर, धनकुटा व तेह्रथुम जिल्लाय् थौंकन्हय् १४ हजार ७३२ हेक्टर क्षेत्रय् व्यावसायिक रुपं च्याखेती जुया वयाच्वंगु दु । नेपाली चियाया थःगु हे जात मदुगुलिं नेपालं विश्वबजारय् दार्जिलिङ, तिब्बतया च्याया नामं निर्यात यायेमालाच्वंगु खँ चिया तथा काफी बोर्डं हिलें धाःगु दु ।
LEAVE YOUR COMMENTS