स्वक्वःगु नेपालभाषा साहित्य नखः तःजिक क्वचाल । शुक्रवाःया तँसापौया सहप्रकाशन नेपालभाषा टाइम्सया ग्वसालय् वंगु शुक्रवाः व शनिवाः निन्हुयंकं नेपाल प्रज्ञा प्रतिष्ठानया चकं दबुली थ्व नखः जूगु खः । नखःया झ्वलय् न्हय्गू सफू विमोचन, थीथी स्वंगूगु विषयय् ‘प्यानल डिस्कस’, स्वीन्याम्ह साहित्यकारपिनि पाखें थःथःपिनि रचना ब्वनेज्या जूगु खः ।
अथेहे साँस्कृतिक ज्याझ्वः अन्तर्गत म्येँ न्यंकेगु, क्यारिकेचर व ख्यालः क्यंगु खः । ज्याझ्वःया हे झ्वलय् नेपालभाषा टाइम्सया ग्वसालय् जूगु चिहाकः संकिपाः धेंधेंबल्लाखय् त्याकादीपिंत सिरपाः व ब्वति काःपिंत सुभाय्पौ देछायेगु नं ज्या जुल । नखः जूगु थाय् प्रज्ञाप्रतिष्ठान परिसरय् नेपाल लिपि गुथि पाखें ‘क्यालिजात्रा’ नं याःगु खःसा थीथी संघसंस्थापाखें सफू ब्वज्या व नसाज्वलंया स्टल नं तःगु खः ।
येँ महानगरपालिकाया मेयर विद्यासुन्दर शाक्यं उलेज्या यानाः न्ह्याःगु मू ज्याझ्वलय् वरिष्ठ साहित्यकार मथुरा साय्मिया आत्मकथा ‘साय्मि, जि मथुरा’ नेपालभाषा एकेदेमिया चान्सलर चित्तरञ्जन नेपालीं, वरिष्ठ गजलकार भूषणप्रसाद श्रेष्ठया गजल मुना ‘नुगःया गुनुगुनु’ जनकवि दुर्गालाल श्रेष्ठ, युवा साहितयकार राजेन्द्र कुमार पुताया गजल समालोचना ‘गजलया सिद्धान्त व नेपालभाषाय् गजल’ व चिनाखं मुना ‘सुथःया लिसः’ किपू नगरपालिकाया मेयर रमेश महर्जन, जासुसी उपन्यासकार राज साय्मिया जासुसी उपन्यास ‘तुयुगु अजः’ व खस नेपाली भाय्या कवि बासुदेव अधिकारीया नेपालभाषा अनुवाद चिनाखं मुना ‘युरो स्पर्श’ येँ महानगरपालिकाया मेयर शाक्यं व साहित्यकार उद्धव मास्केया नियात्रा ‘छगू नन्द देशय्…’ वरिष्ठ साहित्यकार मल्ल के सुन्दरं विमोचन यानादीगु खः ।
ज्याझ्वलय् विमोचित न्हय्गुलिं सफूया बारे भाजु मल्ल के सुन्दरं न्ववानादीगु खः । विमोचन लिपा सफू च्वमिपिनि पाखें हस्ताक्षर ज्याझ्वः नं जूगु खः । मू ज्याझ्वः लिपा ‘रञ्जना लिपिया पुनरुत्थान’ विषयय् अन्तक्र्रिया ज्याझ्वः जूगु खः । सञ्चारकःमि निर्मल वज्राचार्यं सहजकर्ताया भूमिका म्हितूगु थुगु अन्तक्र्रियाय् लिपि गुथिया नायः निरञ्जन तबः, लिपि अभियन्तापिं आनन्द महर्जन, सुनिता डंगोल व सुयोग्य ताम्राकारं ब्वति कयादीगु खः ।
अथेहे थुकुन्हु ग्वसाः खलःया नायः रमेशकाजी स्थापितं विद्वान समालोचक मदुम्ह कमलप्रकाश मल्लया चिनाखं ब्वनाः सुरु यानादीगु च्वसु ब्वनेज्याय् वरिष्ठ व ल्याय्म्हपिं यानाः झिंन्याम्ह साहित्यकारपिंसं थःथःपिनिगु रचना न्यंकूगु खः । थुकुन्हु म्येँ हालामि रानीशोभा महर्जन, रोजी डंगोल श्रेष्ठं म्येँ न्यंकादीगु खःसा बैकुण्ठ भण्डारीं क्यारिकेचर न्ह्यब्वःगु खः ।
अथेहे मदुम्ह नेवाः न्ह्यलुवाः पद्मरत्न तुलाधरं च्वयादीगु ख्यालः ‘हुप्प स्याप्प’ व विजय मानन्धरं च्वयादीगु ‘पराकम्प’ न्ह्यब्वःगु खः । रमेशकाजी स्थापितं निर्देशन यानादीगु हुप्प स्याप्पय् शरद कसाः व कर्ण वज्राचार्य म्हितादीगु खः । अथेहे पराकम्पय भिमसेन रिसाल, अन्नपूर्णेश्वरी श्रेष्ठ, हरिमान दिवाकर, नानीमैँया प्रजापति व राजेश श्रेष्ठं म्हितादीगु खः ।
नखःया निन्हुया न्हि कुन्हु ‘मथुरा साय्मिया साहित्यिक यात्रा’ शीर्षकय् वरिष्ठ साहित्यकार साय्मिलिसे सञ्चारकःमि राजेन मानन्धरं खँल्हाबल्हा यासें ज्याझ्वः सुरु यानादीगु खः । थुकुन्हु नीम्ह साहित्यकारपिंसं थःथःपिनि रचना न्यंकूगु खःसा थ्व लिपा ‘भाषा साहित्य विकासय् संकिपाया भूमिका’ विषयय् सहलह जूगु खः ।
निर्देशक राकेश महर्जन सहजकर्ता जुयादीगु थुगु सहलहय् वरिष्ठ पत्रकार विजयरत्न असंबरे, निर्देशक आर्यम नकःमि, निर्माता ओमचरण अमात्य व कलाकार निर्माता आशिष्मा नकःमिं ब्वति कयादीगु खः । थ्व लिपा चीहाकः संकिपा धेंधेंबल्लाखय् सिरपाः त्याकादीपिं व ब्वति कयादीपिंत शहरी विकास राज्यमन्त्री रामवीर मानन्धरपाखें सिरपाः व सुभाय्पौ लःल्हायेगु ज्याझ्वः जूगु खः ।
ज्याझ्वःया अन्तय् साँस्कृतिक ज्याझ्वः अन्तर्गत म्येँ न्ह्यब्वयेगु लिसें क्यारिकेचर व ख्यालः क्यनेज्या जूगु खः । थुकुन्हु रोजी डंगोल श्रेष्ठ, रानीशोभा महर्जन लिसें यमन श्रेष्ठं नं म्येँ न्यंकादीगु खःसा ‘हुप्प स्याप्प’, ‘पराकम्प’ ख्यालःया लिसें रामकृष्ण खड्गीं च्वयादीगु व वय्कलं हे निर्देशन यानादीगु ‘यमराजया मःमः’ नं न्ह्यब्वःगु खः । थ्व ख्यालकय् रामकृष्णया लिसें रजनी खड्गी, रुपेन्द्र श्रेष्ठ, राजन शाहीं म्हितूगु खः ।
थीथी शेसनय् सहभागी जुयादीपिंत येँ महानगरपालिकाया मेयर शाक्य, किपू नपाया मेयर महर्जन लिसें गोदावरी नपाया मेयर गजेन्द्र महर्जन, नेपाल टेलिकमया प्रबन्धक रिना डंगोल, श्री भैरवी ज्वलेर्सया संचालक प्रदीप ताम्राकार, क्लासिक डाइमन्डया संचालक बाबुराजा महर्जन, मिलन बहुउद्देश्यीय सहकारी संस्थाया सिइओ दिनेश वज्राचार्य, न्यू जेनिथ इंग्लिस स्कूलया प्रिन्सिपल राजु महर्जन, नेवाः न्ह्यलुवा पद्मरत्न तुलाधरया म्ह्याय्मय्जु सुम्निमा तुलाधरपिंसं मतिनाया चिं देछायादीगु खः ।
किपा ः मनोजरत्न शाक्य
LEAVE YOUR COMMENTS